Гадаад харилцааны сайд Л.Болд Дипломат албаны тухай хуульд нэмэлт өөрчлөлт оруулах, Засгийн газрын тухай хуульд өөрчлөлт оруулах тухай хуулийн төслүүдийг УИХ-ын даргад өргөн барилаа.

Хууль санаачлагч Дипломат албаны тухай хуульд нэмэлт оруулах тухай хуулийн төслийн гол агуулгаа танилцуулахдаа Монгол Улсаас НҮБ-ын дэргэд суух байнгын төлөөлөгчийг Элчин сайд нарын адилаар Ерөнхийлөгч УИХ-тай зөвшилцөн томилж, эргүүлэн татдаг болно гэлээ.

Монгол Улсаас НҮБ-ын дэргэд суух байнгын төлөөлөгч нь Аргентин, Бразил, Чили, Перу улсыг хавсран суухаас гадна нийт 61 улсыг хавсран хариуцах учраас ийнхүү УИХ-тай зөвшилцөн томилж, эргүүлэн татдаг болох нь зүйтэй гэж үзжээ.

Дашрамд сонирхуулахад, манай улс одоогоор 164 улстай дипломат харилцаатай бөгөөд цаашдаа 30 улстай дипломат харилцаа тогтоохоор яриа хэлэлцээ хийж байгаа ажээ.