Болгар улсын Изгрев дүүрэгтэй хамтран ажиллахаар боллоо
Хан-Уул дүүргийн ИТХ-ын дарга Д.Батбилэг
2013.10.25

Болгар улсын Изгрев дүүрэгтэй хамтран ажиллахаар боллоо

Иргэдийн Төлөөлөгчдийн Хурал Болгар улсын нийслэл София хотын Изгрев дүүрэгтэй хамтран ажиллахаар боллоо.

Монгол Улсаас Болгар Улсад суугаа Онц бөгөөд бүрэн эрхт Элчин сайд Л.Дүгэржав эх орондоо ажиллах үеэр ИТХ-ын дарга Д.Батбилэг, Тэргүүлэгчдийн нарийн бичгийн дарга бөгөөд Ажлын албаны дарга Б.Бас-Оргил, ИТХ-ын Гадаад харилцаа хамтын ажиллагааны хороон дарга Л.Хадбаатар, ЗДТГ-ын Дэд бүтэц, тохижилтын хэлтсийн дарга Б.Даваажав нар хүлээн авч уулзлаа.

Уулзалтаар Хан-Уул дүүрэгт усалгаатай газар тариалан хөгжүүлэх, ялангуяа өвлийн улиралд зохицсон хүлэмж байгуулах, шинэ техник технологийн төсөл хэрэгжүүлэх, түүнд хөрөнгө оруулалт хийх, ногоочдыг сургаж бэлтгэх талаар харилцан ярилцсан юм.

Түүнчлэн Хан-Уул дүүрэгт хоёр төсөл хэрэгжүүлэхээр харилцан тохиолцсон бөгөөд 2014 онд Иргэдийн Төлөөлөгчдийн Хурал болон Засаг захиргаа, бизнесийн болон нийгмийн байгууллагын төлөөлөгчдийг Болгар улсад албан ёсоор айлчлахыг ноён Элчин сайд урьсан юм.

ИРГЭДИЙН ТӨЛӨӨЛӨГЧДИЙН ХУРЛЫН АЖЛЫН АЛБА