Хэнтий аймгийн ИТХ анх удаа нээлттэй хуралдаж, хүндэтгэлийн  хуралдаанаар аймгийнхаа төв Өндөрхааныг Чингис хот болгон зарлалаа.

Шонхор шувууг үндэсний бахархалт шувуу, Бурхан Халдуныг үндэсний бахархалт хайрханаар зарласантай холбоотойгоор зохион байгуулсан хүндэтгэлийн хуралдааны үеэр Хэнтий аймгийн Өндөрхаан хотыг Чингис хот болгох төслийг аймгийн ИТХ-аар хэлэлцүүлж, иргэдийнхээ санал сэтгэгдлийг сонсч хурлын төлөөлөгчдийн 100 хувийн саналаар Чингис хот болгох тогтоолыг гаргалаа.

Хуралдаанд УИХ-ын гишүүн Эдийн засгийн байнгын хорооны дарга Б.Гарамгайбаатар, УИХ-ын гишүүн дархан аварга Б.Бат-Эрдэнэ, Чингис хааны түүхэн цогцолбор төслийн удирдагч “Цагаан шонхор” холдинг ХХК-ийн захирал Ч.Энхтайван, МУ-ын Ерөнхий сайдын зөвлөх М.Хүдэрбаатар зэрэг төлөөлөгчид мөн Хэнтий аймгийн удирдлагууд, ИТХ-ын төлөөлөгчид, сумдын төлөөлөл, иргэд хөдөлмөрчид үндэсний монгол хувцастайгаа хүрэлцэн ирж өргөнөөр оролцсон байна.

Тодруулбал, Монгол Улсын Үндсэн хуулийн 62 дугаар зүйлийн 62.1 дэх хэсэг, Засаг захиргаа, нутаг дэвсгэрийн нэгж, түүний удирдлагын тухай хуулийн 24 дүгээр зүйлийн 24.1, 24.2 дахь хэсэг, 25 дугаар зүйлийн 25.1 дэх хэсгийг тус тус үндэслэн Хэрлэн сумын иргэдийн оролцоог ханган явуулсан санал асуулгын дүн, Хэрлэн сумын ИТХ-ын 2013 оны долдугаар сарын 14-ний өдрийн гуравдугаар хуралдааны IV тогтоолоор ирүүлсэн саналыг аймгийн ИТХ-ын нээлттэй VI хуралдаанаар хэлэлцэж, Өндөрхаан хотыг “Чингис” хэмээн нэрлэх тогтоол гаргажээ.

Мөн тус хуралдаанаар Хэрлэн сумыг Өндөрхаан сум гэж нэрлэхээр гаргасан иргэдийн саналыг Засгийн газарт өргөн мэдүүлж, УИХ-аар батлуулахаар болсон байна. Их Эзэн Чингис хааны мэндэлсэн аймгийг албан ёсоор Чингис хот болгон нэрлэхээр тогтлоо. Мөн Чингис хотын төвийг Өндөрхаан хэмээн нэрлэх ард иргэдийн саналыг Чингис хотын ИТХ нь Засгийн газарт өргөн мэдүүлснээр, УИХ шийдвэрлэх юм.

Хэнтий аймаг нь Хан Хэнтий нэртэйгээр 1923 онд байгуулагдаж, 70 гаруй мянган хүн амтай, 18 сумаас бүрддэг бөгөөд 2013 онд Аймгийн 90 жилийн ойн баяраа тэмдэглэн өнгөрүүлсэн юм.