Цагаан сараар гурав хоног амардаг болох эсэхийг үргэлжлүүлэн хэлэлцэнэ
Нийтээр тэмдэглэх баярын болон тэмдэглэлт өдрүүдийн тухай хуульд нэмэлт өөрчлөлт оруулах тухай, Хөдөлмөрийн тухай хуульд нэмэлт оруулах тухай хуулийн төслүүдийг өчигдөр чуулганаар хэлэлцээ.
Хуулиудад өөрчлөлт оруулснаар Цагаан сарын баяраар гурван хоног амардаг болох юм. Үүнийг Байнгын хорооны гишүүд дэмжсэн учир чуулганаар хэлэлцэх эсэхийг авч үзлээ. Чуулганы хуралдааны эхний асуудал байсан уг төсөлд УИХ-ын гишүүн Д.Зоригт, Ц.Даваасүрэн нар саналаа хэлснээс өөр санал, шүүмжлэл, асуулт гарсангүй.
УИХ-ын гишүүн Д.Зоригт “Сүүлийн үед олон амралтын өдөртэй болж, баярууд нэмэгдэж байна. Тэгэхээр Цагаан сар, Наадмын бүх нийтийн амралтын гурав дахь өдрийг нь ээлжийн амралтад оруулж тооцох хэрэгтэй” гэв.
Харин УИХ-ын гишүүн Ц.Даваасүрэн “Бурхан багшийн дүйчин өдөр бүх нийтийн амралтын өдөр болгоё” гэдэг санал хэллээ. Ингээд санал хураахад чуулганы хуралдаанд оролцсон гишүүдийн олонхи нь буюу 76.7 хувь нь дэмжиж, дараагийн хэлэлцүүлэгт оруулахаар боллоо.
