Баасанхүү.О 2014.01.09 | Сонин: Өглөөний сонин

Ц.Нямдоржоос илүүгүй ч, Х.Тэмүүжингээс дутуугүй хуульч

 Ц.Нямдоржоос илүүгүй ч, Х.Тэмүүжингээс дутуугүй хуульч
УИХ-ын гишүүн О.Баасанхүү

УИХ-ын отгон ги­шүү­дийн нэг О.Баасанхүүг “Аз нь шовойсон цодгор хүү”, “Н.Энхбаярыг өмгөөлөөд их хурлын гишүүнээр шагнуулсан жаал” гээд бишгүй нэг гоочилцгоосон.

Тэгвэл “Эр өсөж, эсгий сунадаг”-ийг харуулж УИХ-ын гишүүдээс яван чангарч байгаа үзүүлэлтээрээ толгойн хэд дотор торолзож, 2013 онд шилдэг улстөрчдийн 12 дугаарт эрэмбэлэгдсэн нь ямархуу чансааны хууль тогтоогч болон төлөвшиж байгааг нь сонгогч олон үнэлсэн хэрэг билээ.

Яван чангарч байгаа хуульч маань өнгөрсөн долоо хоногийн пүрэв гарагт УИХ-ын дарга З.Энхболдод  Нэмүү өртгийн албан татвар, Шонхор шувууг худалдахыг хориглох тухай, Тамхины эсрэг гэсэн гурван хуулийн  төсөл өргөн барьсан.

Тэрбээр Нэмүү өртгийн албан татварын тухай хуулийн төслийнхөө талаар “Нэмүү өртгийн албан татвараас зарим хүн айдаг. Мөнгөө буцаан авч чаддаггүй учраас үүнийг өөрчилнө. Уг нь Нэмүү өртгийн албан татвар бол татварын том хөнгөлөлт” хэмээн тайлбарлаж байсан.

Нэмэгдсэн өртгийн албан татварын тухай хуулийн зүйл заалтыг нэг мөр ойлгож, хэрэглэх явдлыг хангах, албан татвар ногдуулах үйл ажиллагааг хялбар болгож татвар төлөгчдөд чирэгдэлгүй, хөнгөн шуурхай үйлчлэх нөхцөл бүрдүүлэх нь уг хуулийн төслийн гол зорилго гэдгийг ч О.Баасанхүү гишүүн онцолсон.

Түүнчлэн нэмэгдсэн өртгийн албан татвар тооцох үнэлгээг тодорхойлох  жур­мыг боловсронгуй бол­гох зорилгоор Засгийн газраас төрийн өмчийн аж ахуйн нэгжид олгосон санхүүгийн татаас, үзүүлэх дэмжлэгт тухайн үеийн зах зээлийн үнэ, тарифийг үндэслэн нэмэгдсэн өртгийн албан татвар тооцох үнэлгээг тодорхойлон тогтоож байхаар тусгасан нь өнөөдөр цагаа олсон хуулийн төсөл гэдэгтэй олон хүн санал нийлж байгаа юм.

Нэмүү өртгийн албан татвар бол татварын том хөнгөлөлт” хэмээн тайлбарлаж байсан.

Мөн Засгийн газар 2012 оны 10 дугаар сарын 20-ны өдрийн хуралдаанаараа шонхор шувууг “Үндэсний бахархалт шувуу болгох тухай” 101 дүгээр тогтоол баталсан. Иймд шонхор шувууг цаашид  ашиг олох зорилгоор агнах, гадаадад гаргах, барихыг хориглох нь зүйтэй гэж үзэж УИХ-ын тогтоолын төсөл санаачлан боловсруулсан нь О.Баасанхүү гишүүний эх оронч сэтгэлийн илрэл юм.

Харин нэг өдөр гурван ч хуулийн төсөл өргөн мэдүүлсэн  ажилсаг гишүүний бие жаахан чилээрхэж энэ өдрүүдэд клиникийн II эмнэлэгт  эмчлүүлж байгаа сурагтай. Ямартай ч хууль тогтоох дээд байгууллагад хамгийн олон дархлагдан суугаа Ц.Нямдоржоос туршлага, мэдлэгээр илүүгүй ч Хууль зүйн салбарт шинэчлэл хийж яваа Х.Тэмүүжин сайдаас дутаад байх зүйлгүй гэгддэг  УИХ-ын отгон гишүүн О.Баасанхүү удахгүй ажилдаа орж төрийн ордны хонгилоор торжигнотол алхах нь тодорхой. Засгийн газраас 2014 оныг үйлдвэржилтийг дэмжих жил болгон зарласан.

Үйлдвэржилтийг нэ­мэг­дүүлж нэмүү өртөг шингэсэн бүтээгдэхүүнийг Монгол  даяар хөгжүүлье гэвэл нэмүү өртгийн албан татварт туйлын ухаалаг зохицуулалт зайлшгүй шаардлагатай.

Яг өнөөдөр мөрдөгдөж байгаа өртөг, татварын хуулиуд ху­вийн хэвшлийнхнийг чи­мээгүйхэн багалзуурдаж байгааг хэн хүнгүй мэддэг хэрнээ өөрчилж, шинэчлэх талаар бүлх залгичихсан юм шиг дуугүйхэн гэлдэрсээр өнөөдрийг хүрсэн нь гашуун үнэн.

Тэгвэл энэ чиглэлд О.Баасанхүү гишүүний санаачлан мэдүүлсэн Нэмүү өртгийн албан татварын хууль эерэг хандлага дагуулах нь гарцаагүй.