Монголын багш нарт мэдлэг боловсролоо дээшлүүлэх, харилцан туршлага солилцох онлайн орчин бүрдүүлэх, боловсролын салбарын хүний нөөцийг чадавхжуулах, багшийн хөгжлийг дээшүүлэхэд зорилготой бүтээгдсэн "Багшийн хөгжил" портал сайт /www.teacher.sur.mn/-ийн нээлт боллоо.

Энэ үеэр БШУ-ны сайд Л.Гантөмөр "Боловсрлын чанарыг сайжруулахад багшийн хөгжил чухал бөгөөд ЕБС-ийн багш нарын заах арга барилыг хөгжүүлснээр манай улсын боловсролын салбарын ирээдүй болон улс орны хөгжилд сайнаар нөлөөлөх ач холбогдолтой" гэдгийг онцолсон юм.

Боловсрол, Шинжлэх Ухааны Яамны захиалгаар, Азийн хөгжлийн банкны санхүүжилтээр "Боловсролын салбарын шинэчлэл" төслийн хүрээнд "Багшийн хөгжил" портал сайтыг Цахим сургалтын үндэсний төвөөс бүтээж, Багшийн мэргэжил дээшлүүлэх институт түшиглэн үндэсний хэмжээнд хэрэгжүүлж эхэлж байгаа юм байна.

Монгол улсын багш бүр онлайнаар харилцан суралцаж, ажлын байран дээр мэргэжил ур чадвараа дээшлүүлэн тасралтгүй хөгжих боломжийг Багшийн хөгжил портал сайт бий болгож байгаа юм. Өөрөөр хэлбэл, багш бүр мэдээлэл хүлээн авах, дамжуулах, санаачлагч болох, онлайн орчинд өөрийн шилдэг санаа, шинэ арга зүй технологийг нийтэд түгээн дэлгэрүүлэх, түүнийгээ үнэлүүлэх, багш ярилцагч байх, онлайн хэлэлцүүлэг зохион байгуулах, хэлэлцүүлэгт идэвхтэй оролцох, багш, хүүхэд бүрийг хөгжүүлэх арга туршлагаа баяжуулах зэрэг олон шинэ боломж бий болгож байгаа юм.

Багшийн хөгжлийг дэмжих портал сайт нээгдлээ