Баасанхүү.О Баянсэлэнгэ.З 2014.01.23 | Сайт: News.mn

Эрүүгийн байцаан шийтгэх хуулийн шинэчилсэн найруулгын төсөлтэй хамт хэлэлцэх нь зүйтэй гэв

Эрүүгийн байцаан шийтгэх хуулийн шинэчилсэн найруулгын төсөлтэй хамт хэлэлцэх нь зүйтэй гэв
УИХ-ын чуулган

УИХ-ын чуулганы хуралдаан өнөөдөр 10 асуудал хэлэлцэхээс дөрөвдэхь нь болох Эрүүгийн байцаан шийтгэх тухай хууль, Прокурорын байгууллагын тухай хуульд нэмэлт өөрчлөлт оруулах тухай хуулийг хэлэлцэж дуусаад 14 цаг хүртэл түр завсарлалаа.

Хууль зүйн байнгын хорооны өчигдөрийн хуралдаанд хуулийн төслүүдийн анхны хэлэлцүүлгийг хийх үеэр гишүүн Ж.Батзандан, З.Баянсэлэнгэ нар хууль зүйн шинэтгэлийн хүрээнд хууль хоорондын уялдаа холбоог хангах, суурь болсон процессын хуулиуд, тухайлбал гэмт хэргийн харьяаллыг зохицуулах Эрүүгийн болон Эрүүгийн байцаан шийтгэх хуулийн шинэчилсэн найруулгын төсөлтэй хамт хэлэлцэх нь зүйтэй гэсэн саналыг тус тус гаргасан.

Харин гишүүн О.Баасанхүү “Эрүүгийн байцаан шийтгэх хуулийн 26 дугаар зүйл, 27 дугаар зүйлд  төсвийн хөрөнгийг зориулалтын бусаар зарцуулах гэсний дараа “Мөнгө угаах” гэж тус тус нэмэх” гэсэн зарчмын зөрүүтэй санал гаргасныг Байнгын хорооны хуралдаанд оролцсон гишүүдийн дийлэнх олонх нь дэмжээгүй байна.

Мөн гишүүн Ш.Түвдэндоржийн Эрүүгийн байцаан шийтгэх хуульд нэмэлт, өөрчлөлт оруулах тухай, Прокурорын байгууллагын тухай хуульд өөрчлөлт оруулах тухай хуулийн төслүүдийн агуулга, зарчмыг алдагдуулахгүйгээр найруулгын шинжтэй санал гаргасныг тус Байнгын хорооны хуралдаанд оролцсон гишүүдийн олонх нь дэмжсэн аж.

Ийнхүү чуулганы хуралдаанаар байнгын хороодоор хэлэлцсэн асуудлыг мөн адил дэмжин баталсан байна.