УИХ-ын Эдийн засгийн байнгын хорооны хуралдаан өнөөдөр болж, Газрын тосны тухай хуулийн төслийн шинэчилсэн найруулгын анхны хэлэлцүүлгийг хийлээ.

Ингэхдээ ажлын хэсгээс оруулж ирсэн зарчмын зөрүүтэй саналын томъёоллоор санал хураалгасан юм. Гэвч хэд, хэдэн санал унасанд УИХ-ын гишүүн Г.Батхүү “Ажлын хэсэг хуралдаж ажил болгон гаргасан зарчмын зөрүүтэй саналын томъёоллыг байнгын хорооны хуралдаанаар унагачихаар ямар ч үр дүн гарахгүй байна. Дээр нь хуралдаанд оролцож байгаа гишүүдийн ирц хангалтгүй байна” гэв.

Тус хуралдаанд нийт есөн гишүүн оролцож байлаа. Улмаар УИХ-ын гишүүн Ц.Даваасүрэн нарын гишүүд хүрэлцэн ирснээр унасан саналуудаар дахин санал хураалгасан юм. Ингэснээр жилийн хөтөлбөр, төслөө батлуулаагүй аж ахуйн нэгжийг нэг сарын Хөдөлмөрийн хөлсний доод хэмжээг 100-150 дахин нэмэгдүүлсэнтэй тэнцэх хэмжээний мөнгөн торгууль ногдуулна гэх саналыг буцааж сэргээв.

Мөн газрын тосыг авто зам, төмөр зам, дамжуулах хоолойгоор тээвэрлэж болно гэх заалтыг хасах тухай УИХ-ын гишүүн Г.Батхүүгийн гаргасан саналыг буцааж сэргээлээ. Уг саналыг хасах санал дэмжигдсэнээр Хөвсгөл далайгаар газрын тос тээвэрлэх бололцоо нээгдэж байгаа аж.

Энэ мэтчлэн хэд, хэдэн унасан саналыг дахин санал хураалгаснаар босгож ирсэн юм. Гэвч зарим нэг санал маргаантай байгаа тул дахин нухацтай хэлэлцэх шаардлагатай байна гэж үзсэн тул маргааш УИХ-ын Эдийн засгийн байнгын хорооны хуралдааныг дахин хуралдуулж маргаан дагуулж буй зарчмын зөрүүтэй саналаар санал хураалгахаар болсон юм.

Газрын тосны тухай хуулийн төслийг үргэлжлүүлэн хэлэлцэнэ