Сар шинийн Мэндчилгээ
Хэнтий аймгийн Иргэдийн Төлөөлөгчдийн Хурлын дарга С.ПҮРЭВЖАВ
2014.01.29

Сар шинийн Мэндчилгээ

Мөнх хөх тэнгэрийн зарлигт их Эзэн Чингис хааны өлгий, өндөр их хаад, хатдын нутаг, Монгол төрийн голомтыг сахин суугаа Хан Хэнтийчүүд, Нутгийн зон олон, хүндэт иргэд ээ! Буянт буурлуудаа! Хүүхэд, залуус аа!

            Амархан сайн байцгаана уу!

            Хөх Монголын хойморт ханхайн орших Хан Хэнтий, Бурхан халдун, Хэрлэн, Ононы сав, Хаан ЧИНГИС-ийн мэндэлсэн ахуй баян газар оронд амьдран суух дээд хувь тохиолтой Хан Хэнтийчүүддээ, Монгол улсынхаа нийт ард түмэндээ хийморь, цог золбоо, мандан бадралын билэгдэл болон ирж буй Арвандолдугаар жарны “Ялгуулсан” хэмээгч хөх МОРИН жилийн сар шинийн мэндийг алд цэнхэр хадгийн хамт дэлгэн чин сэтгэлийн мэндчилгээ дэвшүүлж, амрыг тань айлтгаж байна.

Улиран одож буй Арвандолдугаар жарны “Тийн ялгуулсан” хэмээгч усан могой жилд Хан Хэнтий нутаг хөгжил дэвшлийн ололт амжилт, баяр бахдалаар бялхаж, зон олноороо зорилго тэмүүлэлтэй, эв эе зөвтэй ажиллаж, хөдөлмөрлөсний үрээр улсын  “ТЭРГҮҮНИЙ АЙМАГ”-аар шалгарч, “ХӨДӨЛМӨРИЙН ГАВЪЯАНЫ УЛААН ТУГИЙН ОДОН”-оор шагнуулж, хөдөлмөр зүтгэлээ үнэлүүллээ.

Мөнх хөх тэнгэр, төрөлх нутгийн уул ус, газар оронд ивээн тэтгэгдэж, дэлгэр сайхан зусаж, өнтэй сайхан өвөлжин урин хавартай золгож байгаа малчид маань мал сүргээ таван төрөл дээр нь өсгөж, 2 сая 875 мянган толгой мал тоолуулан, улсын хэмжээнд хамгийн олон буюу 582 мянгат малчинтай боллоо.

Өглөө бүр мялааж, өдөр бүр тахиж, үрийн үрд, үеийн үед шүтэх шүтээн Хан Хэнтий, Бурхан Халдун уул Монгол үндэсний бахархалт хайрхан, аймаг, олноороо эвтэй хүчтэй, эд баялагтай байхын бэлэгдэл болсон аймгийн сүлд эр цагаан хүн ШОНХОР шувуу Үндэсний бахархалт шувуугаар өргөмжлөгдсөн нь Хан Хэнтийчүүд бидний ажлын урам зориг, амьдралын эрч хүчийг улам бадрааж байна.

            Айлчлан байгаа хөх морин жилд бид хамтдаа “Алтаргана” хэмээх түүх, ёс заншлын олон улсын хэмжээний томоохон наадмыг өргөн дэлгэр тэмдэглэж, Их Бурхан халдун уулаа тахин, орчин үеийн соёлт хүн ая тухтай, амгалан тайван ажиллаж, амьдрах боломж бүрдүүлсэн “Чингис” хотоо шинээр босгох ажлыг эхлүүлж, хөгжил дэвшлийн ажил, бүтээн байгуулалтыг илүү их санаачлага, илүү их хүч хөрөнгөөр үргэлжлүүлнэ.

            Бидэнд хийх АЖИЛ их байна. Хөх Морин жилд иргэдийн маань бүтээлч, идэвхтэй оролцоо, хамтын гар, сэтгэл нийлсэн зүтгэл, эв эеийг хичээсэн алсын хараатай бодлого, эрч хүчтэй үйл ажиллагаа эрхэм чухал байна.

Морилон ирж байгаа жилдээ хотол түмнээрээ амгалан жаргаж, элгээрээ энх мэнд, тєрлєєрєє түвшин сайхан байж, юу зорьсон, бодсон есєөс илүү хүсэл тань санасан ёсоороо бүтэж, ахас ихэсийнхээ тохойг өргөн хүндэтгэл үзүүлж, нялхас багачуудын алгыг дэлгэн баярлуулж, сар шинэдээ сайхан шинэлээрэй!

Хэнтий аймгийн

Иргэдийн Төлөөлөгчдийн Хурлын дарга                         С.ПҮРЭВЖАВ