Тамхины хяналтын хуулийг илүү чангатгах хэрэгтэй
Тамхины хяналтын тухай хуулийн хэрэгжилтийн талаар УИХ-ын гишүүн Л.Эрдэнэчимэг, Г.Баярсайхан нар Төрийн ордонд мэдээлэл хийлээ.
Мэдээлэлд УИХ-ын нэр бүхий гишүүдээс гадна МХЕГ, Нийслэлийн мэргэжлийн хяналтын газрын холбогдох албан тушаалтнууд оролцсон юм.
Тамхины хяналтын тухай хууль өдгөөгөөс жилийн өмнө буюу 2013 оны гуравдугаар сарын 1-нээс эхлэн мөрдөгдөж эхэлсэн бөгөөд энэ хугацаанд олны зүгэс маш их сайшаалыг хүртсэн гэв. Тамхины хяналтын тухай хуулийг хэрэгжүүлж эхэлснэс хойш дам тамхидалт буурч, үйлчилгээний газрууд эмх цэгцтэй болсныг УИХ-ын гишүүн Л.Эрдэнэчимэг онцлов. ЕБС-аас 500 метрийн зайд тамхи борлуулахыг хориглосноор хүүхдүүдийн тамхидалт эрсч цөөрч, тамхинаас татгалзагчид нэмэгдсэн гэлээ.
Мөн хууль хэрэгжиж эхэлснээр тамхи татах тусгай цэгүд байхгүй гэх шүүмжлэл олны зүгээс гарч, зарим нэг бар ресторанууд тамхи татах тусгай өрөө гаргаж хууль зөрчиж байгаа аж. МХЕГ болон НМХГ-ын явуулсан шалгалтаар нэр бүхий 11 аж ахуйн нэгж тамхи татах тусгай өрөө байгуулсан байсан бөгөөд тэдгээрт 16 сая төгрөгийн торгууль ногдуулсан байна.
УИХ-ын гишүүн Г.Баярсайхан хэлэхдээ "Монгол хүний эрүүл мэндэд сөргөөр нөлөөлж буй олон хүчин зүйл байгаагийн дотор архи,тамхи тэргүүлж байна. Тамхинд 4000 гаруй хорт бодис агуулагддаг. Монгол хүний эрүүл мэндийг хамгаалахын төлөө хуулийн хрэгжилтийг чангатгах, хуулинд нэмэлт өөрчлөлт оруулах замаар илүү чангаруулах хэрэгтэй" гэлээ.
