Боловсролын салбарт хийгдэж байгаа шинэчлэлийн нэг бол багш өөрийгөө дүгнэдэг арга барилыг нэвтрүүлсэн. Багш нар болон салбарын сайд ажлын үр дүнгийнхээ талаар ярилцсан байна.

Гол ололт нь эцэг эх, хүүхэд, багш гэсэн холбоо үүсчээ. Ингэснээр хүүхдүүд хичээлдээ эрс сайжирч, сургалтын чанар сайжирсныг онцоллоо.

Хүүхэд нэг бүрийг хөгжүүлэх, тэдний авьяас чадварыг нээх зорилготой бага боловсролын шинэчлэлийн үр дүн ямар байгааг дүгнэж байна. Багш, сурагчид өөрсдөдөө үнэлэлт дүн өгөх цоо шинэ арга барилд сургуулиуд нэвтэрснээр хүүхдүүдийн өөртөө итгэх итгэл нэмэгдэхээс гадна сурлагын дүнд мэдэгдэхүйц хэмжээгээр ахиц дэвшил гарсныг  багш нар хэлж байлаа.

Хөдөө орон нутаг, нийслэлийн нийтдээ 40-өөд сургуулийн ажлын үр дүнг хэлэлцлээ. Багш нарын арга зүй өөрчлөгдөж, өөрсдийгөө таван чиглэлээр үнэлжээ. Өмнө нь багш нарыг Сургуулийн захирлууд үнэлдэг байсан бол багш нар өөрөө өөрийгөө үнэлж байна.

Багш нар хийх ёстой ажлуудаа жагсааж, хэрхэн гүйцэтгэснээ дүгнэж, түүн дээр нь сургуулийн менежерүүд давхар үнэлгээ өгч байгаа.  Багш нарын хувьд 70-аас дээш хувийн үнэлгээтэй байх ёстой.

Боловсрол, Шинжлэх ухааны сайд Л.Гантөмөр “Өнөөдөр үнэхээр хүүхэд нэг бүрийг хөгжүүлж чадаж байгаа нь Финлянд улс юм. Бидэнтэй яг адил хүн ам нь цөөн. Багш нар, захирлууд нь биенээ мэддэг төдийгүй асуудлаа шийдэж чаддаг.  Тэгэхээр энэ цөөхүүлээ гэдэг давуу талыг л бид чулуу болгох ёстой юм. “Юмны эзэн, сумны занги” бол сургуулийн захирал. Хар толгойгоороо хариуцлагаа хүлээж, байгаа газартаа эзэн байж бодлогоосоо няцалгүй ажиллах хэрэгтэй”гэж сануулсан юм.

Эцэг эх багш, сурагч гэсэн гурвалсан тогтолцоотой болсноор багш нар өөрийн ажлаа дүгнэхэд ямар нэгэн хүндрэлгүй байгаагаа энэ үеэр мөн хэлж байлаа. Эцэг эхчүүдийн хувьд хүүхэддээ тавих анхаарал нэмэгдсэнээс гадна, хүүхэд хичээлдээ дур сонирхолтой болж авьяасаа чөлөөтэй хөгжүүлэх боломж нээгдэж байгааг онцоллоо.