Тамхин бүтээгдэхүүний хууль бус худалдааг устгах тухай протоколыг баталлаа
Хууль санаачлагчийн илтгэлийг Эрүүл мэндийн сайд Н.Удвал танилцуулав
2014.04.25

Тамхин бүтээгдэхүүний хууль бус худалдааг устгах тухай протоколыг баталлаа

Улсын Их Хурлын хаврын чуулганы өнөөдрийн /2014.04.23/ үдээс хойших нэгдсэн хуралдаанаар эхлээд Засгийн газраас өргөн мэдүүлсэн Тамхин бүтээгдэхүүний хууль бус худалдааг устгах тухай протоколыг соёрхон батлах тухай хуулийн төслийг хэлэлцэв. Энэ талаарх хууль санаачлагчийн илтгэлийг Эрүүл мэндийн сайд Н.Удвал, Аюулгүй байдал, гадаад бодлогын байнгын хорооны санал, дүгнэлтийг Улсын Их Хурлын гишүүн Н.Энхболд танилцуулсан юм.

Хэлэлцэж буй асуудалтай холбогдуулан Улсын Их Хурлын гишүүн Б.Бат-Эрдэнэ, Д.Лүндээжанцан нар Эрүүл мэндийн сайдаас асуулт асуун хариулт авсны дараа санал хураалт явуулахад чуулганы нэгдсэн хуралдаанд оролцсон 55 гишүүний 40 нь буюу 72.7 хувь нь дэмжснээр Тамхин бүтээгдэхүүний хууль бус худалдааг устгах тухай протоколыг соёрхон батлах тухай хуулийн төслийг баталлаа,

Б.Бат-Эрдэнэ гишүүн асуув

Протоколыг дэмжиж байна. Тамхины хууль бус худалдаа, худалдааны шаардлага хангаагүй тамхины импортын орж ирж, түүнээс болж хэрэглээг дагаж гарч ирж буй сөрөг үр дагавар нь тулгамдсан асуудал болоод байгаатай санал нэг байна. Нөгөө талаар  дотооддоо тамхи үйлдвэрлэж байгаа үйлдвэрүүд байдаг . Тэдгээр үйлдвэрүүдийн чанар стандарт ямар байна вэ? Үүнд хир анхаарч байна, тооцоо судалгаа  байна уу? Ер нь утаат тамхины хэрэглэгчийн тоо өсөж, насны тоо залуужиж байгаа, залуу эмэгтэйчүүдийн хэрэглээ өсөж байгаа нь сэтгэл эмзэглүүлсэн асуудал байна. Мөн олон улсын чин хандлага ямар явагдаж байна вэ? Энэ талаар хэлж өгөөч

Н.Удвал хариулав:

Манай улс тамхины хэрэглээгээрээ дэлхийд эхний 10-т явна. Хүн амын 15-64 насныханыг 27.1 хувь нь эзлэж байна. Өнөөдөр нийслэлд 930 дэлгүүр тамхи татах тусгай зөвшөөрөл авсан байна.