УИХ-ын нэгдсэн хуралдаанаар Эдийн засгийг эрчимжүүлэх тогтоолын төслийн эцсийн хэлэлцүүлгийг хийж баталлаа.

Тогтоолыг хэлэлцэх үеэр УИХ дахь цөөнхийн бүлэг буюу МАН-ын бүлгээс гаргасан олонхи санал нь дэмжлэг аваагүй юм. Үүнтэй холбогдуулан гишүүд байр сууриа хэллээ.

М.Энхболд: Харамсалтай нь сөрөг хүчний гаргасан саналуудыг дэмжсэнгүй.

Энэ тогтоолыг бид сүүлийн гурван долоо хоног идэвхтэй ярилцсан. Харамсалтай нь сөрөг хүчний гаргасан саналуудыг дэмжсэнгүй. Оюутолгойн төслийн далд уурхайн бүтээн байгуулалтыг түргэтгэх талаар Засгийн газарт чиглэл өгөх заалт орсон. Учир шалтгааныг нь тодорхой болгоогүй байж, энэ ажил 100 хоногт хийгдэнэ гэж байхгүй. Ийм ор нэрийн зүйлүүд дээр санал хурааж байх шаардлага байна уу. МАН-ын бүлэг бид бүх зүйл дээр завсарлага авдаг, боёкотолдог нэртэй боловч улс орны эдийн засгийн асуудал дээр анхаарал тавья гэж сүүлийн найман сарын турш ярьж байгаа. Тэгээд тав, зургаахан оновчтой санал тавьсан байнгын хороо дээр олонхоороо дайраад унагалаа.

Я.Содбаатар: Ирэх наймдугаар 16-н гэхэд 100 хоног нь дуусаж асуух цаг ирэх байх

Унхиагүй ноёонд ургашгүй албат гэгчээр УИХ нь ингэж дэмжээд байхад Засгийн газар маань яаж ажиллах бол доо. Өнөөдөр тавдугаар сарын 8-ны өдөр,  ирэх наймдугаар 16-н гэхэд 100 хоног нь дуусаж асуух цаг ирэх байх. Яагаад гэвэл цөөнхийн оруулж ирсэн олон саналыг эрх баригч нар унагасан. АН өнгөрсөн хоёр жил алдсанаа ухаарч бизнесийн орчноо сайжруулья, нүдэн дээр унаад буй энэ эдийн засгаа сэргээе  тал руу ухаарсан, ухаарлаасаа олж харсан ажлуудаа хийх гэсэн оролдлого юм байх гэж миний бие харж эхлээд их идэвхтэй орсон. Сүүлд нь бол үүнийг нэг удаадаа нийгмийн хийг гаргаж байгаа улстөрийн тоглолт байна гэж харж байна.