Нийслэлийн хэмжээнд хөнгөн бетонын 27 үйлдвэр бий.

Тэдгээрийн нэг БНХАУ-ын хөрөнгө оруулалттай “Дорнын цас" компанийн хөнгөн бетонын үйлдвэрийн нээлтэд өчигдөр Ерөнхий сайд Н.Алтанхуяг, Барилга, хот байгуулалтын сайд Ц.Баярсайхан нар оролцлоо.

Тус компани хэрэглэсэн ус, хаягдал блок, бетоноо дахин ашигладаг, утаа ялгаруулдаггүй шинэ технологи үйлдвэртээ нэвтрүүлжээ.

Ингэснээр жилд 200 мянган шоо метр хөнгөн бетон үйлдвэрлэх ажээ. Засгийн газраас энэхүү компанид 1.5 тэрбум төгрөгийн зээл олгосон байна.

Н.Алтанхуяг сайд үйлдвэрийн нээлтэд оролцох үеэрээ “Манай улс жилд 2000-3000 вагон ачаа бүхий бетоныг гаднаас авдаг. Өнөөдрөөс эхлээд монголчууд ийм хэмжээний бетоныг гаднаас зөөвөрлөх шаардлагагүй болж байна.

Дотоодын зах зээлийн 30 хувийг хангах боломжтой үйлдвэрийг богино хугацаанд барьж ашиглалтад оруулсан “Дорнын цас” компанийн хамт олонд амжилт хүсье.

Манай улс жилд 600 мянган метр куб хөнгөн бетоны хэрэгцээтэй. Энэ хэрэгцээг “Дорнын цас" болон “МАК” компани, хөнгөн бетоны үйлдвэрүүд хангаж, энэ хэмжээний хөрөнгө Монголдоо үлдэх боломжтой боллоо” гэсэн юм.

Компанийн гүйцэтгэх захирал А.Амартүвшингийн хэлж байгаагаар технологийг шинэчлэн хийснээр үйлдвэртээ 60 ажилтан шинээр авчээ. Одоогоор манай улс барилгын 30 орчим материалыг дотооддоо бүрэн үйлдвэрлэж байгааг Барилга, хот байгуулалтын сайд Ц.Баярсайхан хэллээ.

Монголчууд барилгын 30 орчим материалыг өөрсдөө үйлдвэрлэдэг болжээ