Өчигдөр Эдийн засгийн байнгын хорооны хуралдаанаар Төрөөс төмөр замын тээврийн талаар баримтлах бодлогын хэрэгжилтийг хангах зарим арга хэмжээний тухай хэлэлцэх ёстой байсан боловч ирц бүрдээгүй учир тодорхойгүй хугацаагаар хойшлогдсон юм.

Эдийн засгийн байнгын хорооны дарга Б.Гарамгайбаатарыг байнгын хорооны гишүүдийг хүлээж суух зуур УИХ-ын гишүүн Х.Баттулга “Албан ёсоор сайд нь томилогдоогүй байхад байнгын хороо юу хэлэлцэх гээд байгаа юм. Сайд нь томилогдохоор дахин хуралдах юм уу? Ингэж цаг үрж байхаар өнөөдөр хуралдахгүй байсан дээр биз дээ” хэмээн бухимдлаа илэрхийлэв.

16.00 цаг болоход УИХ-ын гишүүн С.Одонтуяагаас өөр гишүүн Эдийн засгийн байнгын хорооны хуралдаанд орж ирээгүй юм. Тиймээс байнгын хороон дарга Б.Гарамгайбаатар гишүүдийн ирц хангалтгүй байгааг шүүмжилж, хуралдааныг хойшлуулсан юм.