Э.Бат-Үүл: Татварын хүрээнд жуулчин татна
Нийслэлийн Засаг дарга бөгөөд Улаанбаатар хотын захирагч Э.Бат-Үүл
2015.01.10

Э.Бат-Үүл: Татварын хүрээнд жуулчин татна

УИХ-ын чуулганы нэгдсэн хуралдаанаар Төсвийн тодотголын хуулийн төслийн дагалдах хуулийн төслийг хэлэлцэв. Хэлэлцэж байгаа асуудалтай холбогдуулан гишүүд асуулт тавьж байлаа. Нийслэлд жуулчдыг хэрхэн татах, жижиг үйлчилгээний газарт татварыг хэрхэн ногдуулах талаар гишүүд  лавлаж байв.

Жишээлбэл, гишүүн Ж.Батзандан “Гэр хороололд амьдрал хүнд байгаа. Тодорхой хэлбэрээр жижиг үйлчилгээ үзүүлдэг газар байна. Ийм газруудад тодорхой тоо тавьдаг. Хөгжил дорой газар бол нийслэлийн хороод.

Энд хэдий хэмжээний татвар ногдуулах гээд байна вэ?” хэмээсэн. “Татварын хувь хэмжээний тухайд 0-1 гэж байгаа юм. Гэхдээ хотын төвийн, захын гэж ангилах байх. Төвлөрлийг сааруулж, нийслэл хотын ая тухтай амьдрах орчныг бүрдүүлэхэд анхаарч байгаа” гэсэн хариултыг Сангийн сайд өгсөн юм.

Харин Нийслэлийн Засаг дарга бөгөөд Улаанбаатар хотын захирагч Э.Бат-Үүл “Энэ татварын хүрээнд жуулчин татах юм. Сөүлд энэ татвараас орлого олсон байдаг. Хүн авчирлаа, бизнес эрхэл гэж татаас өгдөг. Зохицуулалт нь бол явагдана” гэсэн юм. “100 сая төгрөгийн орлоготой үсчин гэж байх уу. Миний эгч үсчин. Үсчид суудлын тоогоор ажилладаг шүү дээ.  100 мянган төгрөг бол мөнгө. Хуулийн үзэл баримтлал арай өөр тийшээ явчих шиг боллоо. Үүн дээр би хариулт авмаар байна. Хэрэгжихэд хүндрэлтэй хуул ороод ирсэн юм шиг байна” хэмээн гишүүн З.Баянсэлэнгэ хэлж байв.

Үүнд хотын мэр Э.Бат-Үүл “Үсчингийн 100 сая гэдэг үг биднээс гараагүй шүү. Оюун гишүүн л асуухаар нь хариулах гээд үзсэн юм. Оюун гишүүнийг үсчин 100 сая төгрөгийн орлоготой гээд ярихаар нь гайхаж байсан юм. Одоо бидэнд хэрэглээ их баймаар байна.

Үсчин, халуун усны газарт хэрэглэгч нэмэгдээд эхэлсэн. Аялал жуучлалын газраас авсан мэдээгээр нэг жуулчин өдөрт 198 ам.долларын худалдан авалт хийдэг. Хувийн хэвшлийнхэн биднийг хүн авчирч өгөөч гээд байгаа” гэсэн хариултыг өглөө.