Бат-Үүл.Э Баттулга.Д 2015.03.20 | Сонин: Ардчилал

Төлөвлөлтөд орсон газарт өмчлөх эрх авсан иргэд газраа "хураалгана"

Төлөвлөлтөд орсон газарт өмчлөх эрх авсан иргэд газраа "хураалгана"
Дахин төлөвлөлт

Нийслэлийн иргэд цахимаар бүртгүүлж, 52 .байршилд гэр бүлийн хэрэгцээний зориулалтаар 15309 га газрыг компьютерийн сонголтоор өмчлөх эрхтэй болох шийдвэр гарснаас хойш хэд хэдэн удаа энэхүү ажлыг амжилттай зохион байгуулаад зарим айл газартаа төвхнөөд амжсан.

Гэтэл 10 байршилд төлөвлөсөн дэд бүтцийн ажил хийгдэх хэсэг иргэдийн өмчлөлд очсон байна. Тухайлбал, сургууль, цэцэрлэг, өрхийн эмнэлэг баригдах газар •иргэдийн өмчлөлд очсон гэнэ. Иймээс Нийслэлийн Засаг дарга захирамж гаргаж уг газрын өмчлөлийг хүчингүйд тооцох аж.

Үүнд, Хан-Уул дүүргийн 10, 12 дугаар хороо, Сонгинохайрхан дүүргийн 21 дүгээр хороо Соёондын ам, 32 дугаар хороо Эмээлт уулын хэсэг гэх мэт газрууд оржээ. Эдгээр газарт цэцэрлэг 19, сургууль 16, үйлчилгээний 28 байршил, хороо өрхийн эмнэлэг 9 байх ёстой аж. Засаг даргын захирамж гармагц олон нийтийн мэдээллийн хэрэгслээр газруудын байршлыг мэдээлэх аж. Уг захирамжид нийслэлийн Хот байгуулалт хөрөнгө оруулалтын асуудал хариуцсан орлогч С.Очирбат хяналт тавьж ажиллахаар боллоо.

Энэ талаар Нийслэлийн Засаг дарга Э.Бат-Үүл "Нийслэлээс шинэ суурьшлын бүсэд дэд бүтэц тавих мөнгө хомс. Иймд тухайн газрын тохижуулах эрхийг аль нэг хувийн хэвшилд олгоно. Хувийн хэвшлийн байгууллага тухайн орчноо тохижуулаад дэд бүтэц татаад газраа түрээслэх юм уу зарж захиран зарцуулах эрхтэй. 11 метр өргөнтэй зам тавьж байгаа бол эргэн тойрны 100 метрийн радиусыг тухайн компанийн мэдэлд өгнө. Энэ жишгээр л бид шинээр суурьшлын бүсийг хөгжүүлэх боломжтой” гэж байлаа.