Гадаад өр хяналтаас гарах вий
УИХ-ын чуулганы 4 сарын 30-ны өдрийн хралдаан
2015.04.30

Гадаад өр хяналтаас гарах вий

Засгийн газраас өргөн барьсан хөрөнгө оруулалтын тухай хуулийг УИХ-ын чуулганаар хэлэлцлээ.

Нэлээд халуун уур амьсгал дунд болсон хуулийн төслийг хэлэлцэх нь зүйтэй хэмээн үзэж холбогдох байнгын хороо руу шилжүүллээ. Манайд баялаг нь байгаа ч технологи нь алга.

Тиймээс хөрөнгө оруулалт татахгүйгээр баялгаа мөнгө болгож чадахгүй гэдгийг гишүүд ихээр ярьдаг ч эсрэгээр нь боловсруулж байгаа хууль нь хөрөнгө оруулагчдыг үргээж байгааг эдийн засагчид онцолдог.

Харин хуулийн төслийг хэлэлцэх үеэр УИХ-ын гишүүн Ж.Энхбаяр “Гадаадын хөрөнгө оруулалтанд хасах 250 сая ам.доллар гарсан.Сар болгон 400-500 сая ам.доолар орж ирдэг байсан. Жилдээ 4-5 тэрбум ам.долларын хөрөнгө оруулалт ордог байсан. Өдөр болгон Буянт ухаад хөрөнгө оруулалт хиймээр байна гэсэн хүмүүс хувийн онгоцоор ирдэг байсан. Одоо бодоход зүүд зэрэглээ шиг.

Өр зээлийнхээ асуудлыг хар л даа. 25 тэрбум доллар давлаа ш дээ. Гадаад худалдааны төлбөрийн гол балансийг хийж байсан хөрөнгө оруулалт зогсчихоор улсын валютын сан маш хурдацтай багасаж байна. Зөвхөн хувийн хэвшлийнхний өр гэхэд тэрбум ам.доллар давчихсан” гэлээ.

 

Харин УИХ-ын гишүүн Ц.Нямдорж “Үнэндээ энэ хөрөнгө оруулалтын хууль чинь хачир дээрээ гадаадын хөрөнгө оруулалтыг татах биш цааш нь явуулах хууль болсон ш дээ. Хуучин хууль сайн байгаагүй л дээ. 2012 онд стратегийн салбарт Гадаадын хөрөнгө оруулалтыг хязгаарлах тухай хууль гаргаж нэг будлиан хутгасан.

Тэр үед би осолтой галаар та нар тоглож байна болиоч гэж хэлээд дийлээгүй шд. Тэгтэл жилийнхээ дараа хүчингүй болчихсон мөртлөө гадаадын хөрөнгө оруулалтын тухай хуулийг давхар хүчингүй болгосон. Үүнийг би бодлогын алдаа байсан гэж үздэг" гэлээ.

УИХ-ын гишүүн Б.Бат-Эрдэнэ "Гадаадын хөрөнгө оруулалтын асуудал бол Ерөнхий сайдын мэдэлд гадаадын хөрөнгө оруулалтыг хариуцсан агентлаг байсан. Өмнө гадаад хэргийн яаманд харьяалагдаж байсныг мэднэ."

УИХ-ын гишүүн Ө.Энхтүвшин “Хууль гэхээс илүү бидний хандлага чинь гай болоод байгаан биш үү. Хамгийн сүүлийн жишээ гэвэл Тавантолгой. Үүнийг чинь УИХ-аар хэлэлцэнэ аваад ир гээд байдаг. Тэгээд яг өргөн барихаар шаардлага хангаагүй гээд буцаагаад. Ингээд байгаа чинь гадаадынханд итгэл төрүүлж чадахгүй байна” гэлээ.

УИХ-ын гишүүн Д.Тэрбишдагва “Ерөнхий сайдын мэдэлд байгаа хөрөнгө оруулалт. Нөгөө талаас хамгийн том хөрөнгө оруулалт буюу мега төсөл хариуцсан сайд болон Ерөнхий сайдын ажил давхцаад байх шиг" гэв.

 

Ямартай ч хуулийг олонхи дэмжсэнээр анхны хэлэлцүүлэгт бэлдүүлэхээр байнгын хороо руу шилжүүллээ.