Улсын Их Хурлын гишүүн Л.Болд, Ц.Оюунгэрэл нарын урилгаар /2015.06.26/ Монголын Хараагүйчүүдийн Үндэсний Холбооны залуучуудын төлөөлөл нийт 40 хүн Төрийн ордон, УИХ-ын чуулганы үйл ажиллагаатай танилцаж, есөн хөлт цагаан туганд хүндэтгэл үзүүллээ.

УИХ-ын чуулганы танхимд анх удаа харааны бэрхшээлтэй иргэд зочилж буй бөгөөд УИХ-ын гишүүд халуун дотноор хүлээн авч алга ташин баяр хүргэсэн юм.

Төрийн ордонтой танилцах аялалын төгсөлд Төрийн түүхийн музейд айлчиллаа. Харааны бэрхшээлтэй иргэдэд зориулж Төрийн түүхийн музей гурван тайлбарлагч гарган үзмэр бүрийг нэгд нэгэнгүй нарийн тайлбарлаж, музейд байрлах боломжит бүх үзмэрт харааны бэрхшээлтэй иргэдийг тэмтэрч үзэх боломжийг нь олгосон юм.Төрийн сүлд, УИХ-ын даргын ширээ сандал, Их Монгол улсын анхны нийслэл Хархорум хотын туурийн орчмоос олдсон том чулуун яст мэлхий зэргийг тэмтрэн үзэж Төрийн сүлдэндээ мөргөсөн юм.
Харааны бэрхшээлтэй иргэд УИХ-ын гишүүд, Төрийн ордны ажилтнууд, Төрийн ордны хамгаалалтын алба, Төрийн түүхийн музей болон ордонг танилцуулсан нийт ажилтнуудын үйл ажиллагаанд өндөр сэтгэгдэлтэй байгаагаа хэлээд “Төрийн минь сүлд өршөө, Түмэн олон минь амгалан байг” хэмээн ерөөж талархал илэрхийлээд гарлаа.

Чуулганы танхимд анх удаа харааны бэрхшээлтэй иргэд зочиллоо