УИХ-ын чуулганаар Нэмэгдсэн өртгийн албан татварын тухай /шинэчилсэн найруулга/ болон холбогдох бусад хуулийн төслүүдийг хэлэлцлээ. Эдгээр хуульд өөрчлөлт оруулснаар дотоодын үйлдвэрлэгчдээ дэмжих боломжтой болно гэж хууль санаачлагчид ярьж байна. Төсвийн байнгын хорооны танилцуулгыг Улсын Их Хурлын гишүүн Р.Амаржаргал танилцууллаа.

Энэхүү хэлэлцүүлэг нь эцсийн хэлэлцүүлэг юм. Энэ үеэр УИХ-ын гишүүн О.Баасанхүү “НӨАТ-ын хэмжээг өөрчлөхөд энэ хуулийн төслүүдийн гол зорилго бий. Гэхдээ энэ хуулийн төсөл өөрчлөлт хийж чадсан уу. Энэ хуулийн төсөлд олон улсын байгууллага гэж байна. Энийг юу гэж ойлгох юм бэ. Гаднаас эмнэлгийн тоног төхөөрөмж хандиваар авлаа гэхэд олон улсын байгууллага биш гээд татвар аваад байна гэх гомдол байдаг.

Салбараас нь хамаарч “олон улсын” гээд байна уу. Энүүний ялгааг сайн гаргаж өгөөч. Хүмүүнлэгийн тусламжуудаа дэмжиж байгаа юм бол түүнийг нь НӨАТ-аас чөлөөлөх боломж байна уу. Хөшөө оруулж ирэхээрээ НӨАТ-аас чөлөөлж болдог, хүүхдэд хандивын хувцас оруулж ирэхээр чөлөөлдөггүй шүү” гэсэн асуултыг асуулаа.

Түүнд УИХ-ын гишүүн Р.Амаржаргал “Жижиг, дунд үйлдвэрлэлийг дэмжиж байгаа. Хоёрдугаарт энэ хүмүүс хүсвэл хэзээ ч НӨАТ-т хамрагдах эрх нь нээлттэй бий.Таны асуусан олон улсын байгууллагыг хэрхэх нь байнгын хорооны эцсийн хэлэлцүүлгээр хэлцэгдээгүй” гэсэн юм. Энэхүү хуулийг батлавал ирэх оноос хэрэгжиж эхлэх юм.

Нэмэгдсэн өртгийн албан татварын тухай хуулийн төслийг бүхэлд нь батлах талаар санал хураахад УИХ-ын гишүүд дэмжлээ. НӨАТ-аас чөлөөлөх тухай хууль хүчингүй болсон тухай хуулийн төслөөр санал хураахад 72,7 хувийн саналаар дэмжсэн бол НӨАТ-ын тухай хуулийн дагаж мөрдөх журмын тухай хуулийн төслөөр санал хураахад гишүүдийн 67,3 хувийн саналаар дэмжив.

УИХ-ын гишүүн Д.Батцогт

Түүнчлэн хувь хүний албан татварын тухай хуульд нэмэлт оруулах туай хуулийн төслийг 66,7 саналаар дэмжиж, Орлогыг нь тухай бүр тодорхойлох боломжгүй иргэдээс татвар ногдуулах тухай хуулийн төслийг хүчингүй болголоо.

Татварын тухай хуульд нэмэлт оруулах тухай хуулийн төслийг 70,2 хувийн саналаар, Банкны тухай хуульд нэмэлт оруулах тухай хуулийн төслийг мөн гишүүдийн олонхын саналаар тус тус дэмжлээ. Ингэснээр Нэмэгдсэн өртгийн албан татварын тухай /шинэчилсэн найруулга/ болон холбогдох бусад хуулийн төслүүдийг баталж, НӨАТ-ын босгыг 10 саяас 50 сая болголоо.

НӨАТ-ын босгыг 50 сая болголоо

НӨАТ-ын босгыг 50 сая болголоо