Жил бүрийн 09 дүгээр сарын 10-ны өдрийг “Улс төрийн хилс хэрэгт хэлмэгдэгсдийн дурсгалыг хүндэтгэх өдөр” болгон тэмдэглэн өнгөрүүлдэг.

Энэ хүрээнд 2015 оны 09 дүгээр сарын 09-ний өдөр Баянгол дүүргийн удирдлагууд дүүрэгтээ оршин суудаг өөрийн биеэр хэлмэгдсэн болон, хэлмэгдэгсдийн гэр бүл, үр хүүхэд, ач зээ болох 100 гаруй иргэнийг хүлээн авч хүндэтгэл үзүүллээ.
Уг арга хэмжээнд Баянгол дүүргээс сонгогдсон УИХ-ын гишүүн, ХАХНХ-ын сайд С.Эрдэнэ, УИХ-ын гишүүн С.Одонтуяа, дүүргийн Цагаатгах ажлыг удирдан зохион байгуулах салбар комиссын дарга, ИТХ-ын дарга Д.Дэлгэрбат, ИТХ-ын Ажлын албаны дарга П.Цэцэгмаа, Засаг дарга Д.Оросоо нар оролцож хэлмэгдэгсдэд хүндэтгэл үзүүлж, тэдний санал бодлыг сонссон юм.

Баянгол дүүрэгт өөрийн биеэр хэлмэгдсэн Ц.Лоохууз, Т.Галсан, Г.Жамъян, Д.Эльбрус, Ж.Нямдарь нарын иргэн байдаг бөгөөд дүүргийн удирдлагууд, салбар комиссын зүгээс тэднийг жил бүр хүлээн авч уулзан, шаардлагатай тусламж дэмжлэгийг үзүүлдэг байна.
Дашрамд дуулгахад маргааш буюу 2015 оны 09 дүгээр сарын 10-ны өдрийн 11:00-13:00 цагийн хооронд Баянгол дүүргийн нутаг дэвсгэрт замын хөдөлгөөнд оролцож байгаа бүх тээврийн хэрэгслийн гэрлийг асаалгаж хэлмэгдэгсдэд хүндэтгэл үзүүлэх ажлыг дүүрэг дэх Замын цагдаагийн тасагтай хамтран зохион байгуулах юм.

Улс төрийн хилс хэрэгт хэлмэгдэгсдэд хүндэтгэл үзүүллээ