Геологийн төв лабораториос уул уурхайн компаниудад санал болгож буй шинэ тоног төхөөрөмжүүдийн талаар мэдээлэл хийлээ.

Тэд Уул уурхайн яам, Ашигт малтмалын газартай хамтран энэ сараас эхлэн долоо хоног бүрийн Мягмар, Пүрэв гаригуудад “Итгэмжлэлээс Итгэлцэл” хөтөлбөрийн хүрээнд “Ашигт малтмалын хайгуулан ажлын үр нөлөөг сайжруулахад итгэмжлэгдсэн лабораторийн оролцоо” сэдэвт семинарыг зохион байгуулахаар болсон аж. Тус семинарт хайгуулын компаниудын эзэд, захирал, ерөнхий геологич болон бусад геологичид хамрагдах боломжтой аж. Монгол Улсын Геологийн төв лаборатори нь Дэлхийн түвшинд ISO/IEC 17025, ISO Guide 34, ISO/IEC 17043 гурвалсан стандартуудаар “Платинум” түвшинд итгэмжлэгдсэн Эрдсийн шинжилгээний цогц үйлчилгээ үзүүлдэг Монгол Улсын анхны лаборатори болсон билээ. Геологийн төв лаборатори эдгээр гурвалсан стандартыг нэвтрүүлснээр лабораторийн чанарын хамгийн өндөр түвшинд хүрч байгаа бөгөөд ийм гурвалсан итгэмжлэлийг дэлхий дахинд “Платинум Стандарт” хэмээн нэрлэдэг аж.

Монгол Улсын Геологийн төв лабораторийн захирал Норовын Тэгшбаяр: АНУ-ын Үндэсний итгэмжлэлийн байгууллага (ANAB)-аар итгэмжлэгдсэн 800 лаборатори, байгууллага байдгаас зөвхөн тав нь л ийм гурвалсан итгэмжлэлтэй.

Тэдний нэг нь бол Монгол Улсын Геологийн төв лаборатори бөгөөд Эрдсийн шинжилгээний бүрэн цогц шинжилгээ хийдэг, гурвалсан итгэмжлэлтэй Платинум стандарт хангасан, дэлхийн түвшинд хүлээн зөвшөөрөгдсөн Монголын анхны хамгийн том лаборатори боллоо. Тиймээс бидний зохион байгуулж ажлын байгаа хүрээнд “Ашигт малтмалын хайгуулын ажлын үр нөлөөг сайжруулахад итгэмжлэгдсэн лабораторийн оролцоо” сэдэвт сургалтад компаниудыг идэвхитэй оролцохыг урьж байна.