УИХ дахь “Шударга ёс" эвслийн бүлэг ээлжит бусаар хуралдах болсон шалтгаан, гарсан шийдвэрийнх нь талаар бүлгийн дарга З.Баянсэлэнгээс тодрууллаа.

-Ерөнхий сайд Ч.Сайханбилэгийг огцруулах саналыг “Шударга ёс” эвслийн бүлгийн гишүүн Г.Уянга гаргасан. Уг асуудлыг эвслийн бүлэг хэлэлцээд ямар шийдвэрт хүрсэн бэ?

-Г.Уянга гишүүний гаргасан саналыг дэмжихгүй гэсэн байр суурьт нэгдсэн. Уг асуудлыг бүлгийн хурлаараа нухацтай ярилцаж, санал солилцсон. Цаг хугацааны хувьд огцруулах асуудлыг дэмжиж болохгүй юм.

Учир нь Монгол Улсын эдийн засаг хүнд байна. Тухайлбал, өнөөдрийн байдлаар төрийн албан хаагчдын цалинг тавиагүй л байгаа. Иймд эдийн засгийн нөхцөл байдалтай холбогдуулан Засгийн газар бонд гаргахаар бэлтгэж байна. Тиймээс үүсээд байгаа нөхцөл байдлыг бодолцох шаардлагатай.

-Гэхдээ Г.Уянга, О.Баасанхүү, Л.Цог нар танай бүлгийн гишүүн. Хэдийгээр хамтарсан Засгийн газрын гол хамтрагч ч танай бүлгийн зарим гишүүн кабинетынхаа бодлого, үйл ажиллагааг дэмждэггүй. Энэ талаар ямар байр суурьтай байгаа вэ?

-Ерөнхий сайд Ч.Сайханбилэгийг огцруулах асуудлыг дэмжихгүй гэдэг нь хамгаалж, хайр зарлаж байгаа хэрэг биш. “Шударга ёс” эвсэл ард иргэдийн хүсэж байгаа байр суурийг баримтлах үүднээс шийдвэрээ гаргалаа. Ерөнхий сайдыг огцруулах бичигт гарын үсэг зурсан “Шударга ёс” эвслийн гурван гишүүн үүнд хүндэтгэлтэй хандах хэрэгтэй. Мөн бид шийдвэрийг дагах зөвлөмж, чиглэл өгсөн.

Бүлгийн шийдвэрийг Г.Уянга нар хүндэтгэх хэрэгтэй