Ерөнхий сайдыг огцруулж чадаагүйдээ шаралхсан УИХ-ын гишүүн Г.Уянга, Л.Цог, О.Баасанхүү нар “Шударга ёс” эвслийн бүлгээс гарч, бүлгээ тараах гэж байна гэсэн мэдээлэл гараад буй. Эвслийн бүлэг тарвал хамтарч засаг байгуулсан нэг субьект эрх зүйн чадамжгүй болж, Засгийн газар огцрох асуудал дахин босож ирэх юм. Бүлгээсээ гарах шийдвэрийнх нь талаар О.Баасанхүү, Г.Уянга нараас тодрууллаа.

УИХ-ын гишүүн О.Баасанхүү: 

-УИХ-ын гишүүн Л.Цог, Г.Уянга нар гурван удаа “Бүлгээс гаръя, хэвлэлийн хурал хийе” гэж орж ирсэн. Бид ярилцаж л байна. Миний хувьд юу юугүй бүлгээс гарч, бүлгийг задаах бодолгүй байгаа. Гэхдээ миний тавьж байгаа шаардлагыг биелүүлэхгүй бол бүлгээс гарахыг ч бас үгүйсгэхгүй. Би бүлгийнхэндээ хоёр л асуудал тавьж байгаа. Нэгдүгээрт, бүлэг чадамжгүй байна. Бүлгийн дарга давхар дээлгүй байх ёстой. Бүлгийн даргаа яаралтай сольж, МАХН-аас бүлгийн дарга тавь гэсэн. Давхар дээлгүй МАХН-ын гишүүн гэюл Д.Тэрбишдагва, бид хоёр байна. Эсвэл бүлгээ задлаад МАН-тай хамтарч бүдүүн бүлэг байгуулах хэрэгтэй. МАХН, МАН хоёр нэг бодлого, нэг угшилтай тул нэг зорилгын төлөө явахад болохгүй юмгүй. Хоёр намын ахмадууд ч үүнийг хүсэж байгаа.

УИХ-ын гишүүн Г.УЯНГА:

-Энэ талаар одоохондоо юу ч яримааргүй байна. Эвслийн бүлэг тарахаа болбол нэг л өдөр тарна. Тэр үед нь л мэдээлэл хийе. Үүнээс өмнө тэгнэ, ингэнэ гээд яриад байх шаардлагагүй. Өчигдөр хэвлэлийн хурал хийхдээ энэ асуултад хариулахдаа “Бүлгийг одоохондоо задлахгүй” гэж хэлсэн мэтээр мэдээлсэн байсан. Би тэгж хэлээгүй.