Хөдөлмөрийн яамны харьяа Баянхонгор аймаг дахь МСҮТ сайдын тушаалаар Политехникийн коллеж болж сургалтын түвшингээ нэг шатаар ахиуллаа. 1963 онд “Барилгын сургууль комбинат” нэртэйгээр байгуулагдаж үйл ажиллагаа эхэлсэн монгол улсын хоёр дахь мэргэжлийн сургууль 53 жилийнхээ босгон дээр шинэ түүхэн хуудсаа нээлээ. 

Энэхүү ажиллагаанд УИХ-ын гишүүн Д.Ганбат, Хөдөлмөрийн сайдын зөвлөх Ч.Даваабаяр, Баянхонгор аймгийн Засаг дарга Д.Жаргалсайхан, ИТХ-ын дарга Д.Ширмэн болон сургуулийн үе үеийн захирал, багш ажилчид, суралцагчдын төлөөлөл оролцлоо.

МСҮТ нь 2.5 жилийн хугацаатай боловсрол олгодог байсан. Политехникийн коллеж болсоноор 1.5 жил нэмж суралцан мэргэжлийн дипломтой төгсөх юм. Ингэснээр өөрийн сонгосон мэргэжлээр үргэлжлүүлэн дээд бакалаврын түвшинд суралцах боломж бүрэн нээгдэж байгаа юм. Мөн гадаад, олон улсын хамтын ажиллагаа шинэ түвшинд гарч БНСУ, Япон, Австрали, АНУ зэрэг улсуудтай хамтран багш, сурагчдыг солилцооны хөтөлбөрийн дагуу сургах бүрэн боломжтой боллоо. 

УИХ-ын гишүүн Д.Ганбат

Сар шинийн өмнөхөн 53 жилийн түүхтэй Баянхонгор аймгийн МСҮТ Политехникийн коллеж боллоо. Хүүхэд залуучуудад том боломжийг болгосон үйл явдал болж байна. Баянхонгор аймгийн удирдлагууд Баялаг бүтээгчдийг дэмжих холбоотой хамтран ажиллах гэрээнд гарын үсэг зурсан. Ингэснээр баялаг бүтээгчдийг төрүүлж байдаг политехникийн коллежийн сурагчдыг дэмжиж ажиллана гэдэгт итгэлтэй байна. Коллеж болсоноор гадаад хамтын ажиллагаа өөрчлөгдөж БНСУ, Австрали, Япон, АНУ-тай хамтран багш, сурагчдыг сургах ажлыг зохион байгуулна. 

Хөдөлмөрийн сайдын зөвлөх Ч.Даваабаяр

Хөдөлмөрийн сайдын тушаалаар Баянхонгор аймгийн МСҮТ, Политехникийн коллеж болж нэг шат ахилаа. Энэ сургуульд ажиллаж байсан багш ажилчид, сурагчдын түүхэнд тэмдэглэхүйц ажил боллоо. Хангайн бүсийн анхны Политехникийн коллеж Баянхонгор аймагт бий боллоо. Мөн Баянхонгор аймгийн удирдлагууд 2016 оныг "Баялаг бүтээгчдийг дэмжих жил" болгон зарласан. Политехникийн коллеж нь баялаг бүтээгчдийг төрүүлдэг сургалтын бааз юм. Бидний хамтын ажиллагаа энэ ажлаар эхэлж байна гэж хэлж болно. 

Баянхонгор аймгийн Политехникийн коллежийн захирал Ш.Чимгээ

2016 оны босгон дээр бид нэг шат ахиж Политехникийн коллеж боллоо. Ингэснээр 1.5 жил нэмж суралцаад бүх төрлийн мэргэжлээр дипломын боловсрол эзэмших бүрэн боломжтой. Баянхонгорын политехникийн коллежийг төгсөөд их дээд сургуульд суралцаж бакалаврын мэргэжил ч эзэмшиж болно. Политехникийн коллеж болохын тулд сургалтын орчин, сургалтын хөтөлбөр, багш, ажилчдын мэргэжлийн ур чадвар зэрэг үзүүлэлтийг хангаж байж сургалтын түвшин ахидаг. Цаашид хоол үйлдвэрлэл, оёдол үйлдвэрлэл болон автын чиглэлээр боловсон хүчин, сургалтын орчныг сайжруулж ирэх намраас политехник коллежийн боловсролыг олгох боломжтой.