УИХ дахь МАХН-МҮАН-ын “Шударга ёс” эвслийн бүлгийн дарга Н.Батцэрэгээс цаг үеийн асуудлаар дараах тодруулгыг авлаа.

-Намын жагсаалтын 28 квотоос 6-г нь нийслэлийн мандат дээр нэмэх асуудал ярьж байна. Энэ асуудалд танай бүлэг ямар байр суурьтай байна вэ?

-Засгийн газрын хуралдаанаар энэ асуудлыг хэлэлцэх үеэр би мэдсэн. Уг хуулийн төслийг УИХ-ын гишүүн Ш.Түвдэндорж өргөн барих гэж байгаа юм билээ. Засгийн газраас санал асуусан ч тухайлан өгөх саналгүй гэсэн. Манай бүлэг энэ асуудлаар хуралдаж, байр сууриа гаргаагүй байна.

Засгийн газрын гишүүнээр томилогдсоны дараа би хоёр намын даргад бүлгийн даргын ажлаа өгөх саналаа амаар хэлсэн. Гэтэл улс төрийн нөхцөл байдлаас шалтгаалан намайг бүлгийн даргын ажлаа хийж бай гэсэн чиглэл өгсөн

-"Шударга ёс" эвслийн бүлгийн даргаар УИХ-ын гишүүн Ч.Улааныг томилно гэсэн мэдээлэл байна. Бүлгийн даргыг солих талаар бүлгээр хэлэлцсэн үү?

-Бүлэг дээр энэ асуудлыг яриагүй. Засгийн газрын гишүүнээр томилогдсоны дараа би хоёр намын даргад бүлгийн даргын ажлаа өгөх саналаа амаар хэлсэн. Гэтэл улс төрийн нөхцөл байдлаас шалтгаалан намайг бүлгийн даргын ажлаа хийж бай гэсэн чиглэл өгсөн. Хэрвээ бүлгээр энэ асуудлыг хэлэлцвэл би ажлаа өгөхөд бэлэн. Гурван давхар дээлтэй гэж заримдаа адлагдаж байна.

Ажлын ачааллаа бодсон ч зарим үед 24 цаг багадмаар санагддаг. Одоогоор манай бүлэг дээр аль нэг гишүүнийг бүлгийн дарга болгоно гэж ярилцаагүй. Түүх ярьвал, 2012 оны сонгуулийн дараа хоёр нам ярилцаж байгаад МАХН-ын гишүүн Л.Цогийг УИХ-ын дэд дарга, МҮАН-ыг төлөөлж миний бие “Шударга ёс” эвслийг удирдахаар болсон. Гэхдээ одоо ажлаа өгөхөд ямар ч асуудалгүй. Хоёр намын дарга нар ярилцаад хэнийг томилохоо шийдэх байх.

-МҮАН-д АН нэгдэх санал тавьсан. Энэ асуудлыг танай нам дотроо хэлэлцсэн үү?

-АН-аас манай намд 2016 оны сонгуульд нэгдэн орох санал өгсөн. Энэ саналыг бид судалж үзсэн. Намын Удирдах зөвлөлийн хүрээнд яриад намын дарга "Нэгдэн орох бололцоогүй, харин хамтрах боломжтой" гэсэн хариу өгсөн. Намрын чуулган эхлэхэд ямар байдлаар сонгуульд оролцох вэ гэдгээ эцсийн байдлаар шийднэ.

Би бүлгийн даргын ажлаа өгөхөд бэлэн