УИХ-ын гишүүн Д.Сумъяабазар болон Сонгинохайрхан дүүргийн ИТХ-ын дарга тэргүүтэй албаныхан 19, 30 дугаар хорооны иргэдтэй уулзсан аж.

Уг уулзалтад тус дүүргийн иргэдийн төлөөлөл ирж холбогдох албаныхнаас асуулт асууж, нэн тэргүүнд шийдвэрлэх шаардлагатай байгаа асуудлын талаар ярьж байв. Энэ уулзалтад оролцсон нэгэн өндөр настан эрх баригчдын талаар ундууцан “УИХ-ын дарга яагаад та нараар үг хэлүүлэхгүй микрофоныг чинь хаагаад байдаг юм бэ. Та нараар үг хэлүүлэхгүй байгаа хүмүүс бид нарын үгийг сонсох уу. Би ам.долларын ханшийг 2040-д барьж байгаа нь миний гавьяа гэж хэлээд байх юм ямар учиртай юм бэ.

Монгол улсын мөнгөн тэмдэгт гэж ер нь байгаа юм уу. 70 настай, найман хүүхэдтэй хөгшинд яагаад одонгийн мөнгө өгөхгүй гээд байгаа юм бэ. Хүүхдүүд нь том болчихсон болохоор өгөхгүй гэдэг чинь юу гэсэн үг вэ. Тэтгэвэр 30 хувиар нэмнэ гэсэн хаана байгаа юм. Уг нь бага гэлтгүй энэ бүх халамжийн асуудлууд иргэдэд дэм болж байсан нь мэдрэгдэж байна” гэсэн юм. Д.Сумьяабазар гишүүн энэ асуулт болон хүүхдийн мөнгөтэй холбоотой иргэдийн тавьсан бусад асуултад “Хүүхдийн мөнгийг өгөхийг би 100 хувь дэмжиж байгаа. Энэ тухайгаа ч чуулганы хуралдааны үеэр хэлсэн. Ер нь бид хүүхдүүдээсээ мөнгө харамлах ёсгүй. Тэд чинь энэ улсын ирээдүйн эзэд шүү дээ. Нөгөөтэйгүүр бага ч гэсэн энэ мөнгө олон айлын амьжиргаанд нэмэр болж байгааг би нүдээр үзсэн. Тиймээс энэ асуудлыг хуучнаар үргэлжлүүлэх саналтай байгаа” гэдгээ хэлсэн байна.

 Мөн иргэд Сонгинохайрхан дүүргийн иргэд өөрсдийг нь парламентад төлөөлж буй гишүүнээсээ сонгуулийн маргаан болон квотын талаарх асуулт асууж байлаа. Энэ асуултад гишүүн “Үндсэн хуульд заагдсан эрхийнхээ дагуу хууль тогтоох дээд байгууллагад өөрийн төлөөллөө сонгох чухал ажил. Гэтэл сонгууль бүрт том жижиг маргаан гардаг. Үүний нэг том жишээ нь би өөрөө зогсож байна. Энэ мэт амаргүй байдлыг зохицуулах үүднээс зохицуулалтуудыг хийсэн.  Түүнчлэн намын жагсаалтаар орж ирэх 28 хүртэлх гишүүний асуудал Үндсэн хуультай зөрчилдөөд байдаг. Түүгээр ч зогсохгүй өнгөрсөн сонгуулиар жагсаалтаар УИХ-д суусан хүмүүс дахиад ч гараад ирэх магадлалтай байна. Бид үүнийг цэгцлэх гэхээр бидний дардаг 26 кноп багадаад байна. Олны хүч давамгай байдаг юм байна” гэв.

Сонгуультай холбоотойгоор иргэдийн зүгээс асууж байгаа бас нэг том асуудал нь санал тоолох автомат машин буюу хар машин. Иргэд энэ машинд төдийлөн итгэдэггүй юм байна. Саналыг нь луйвардчихвий гэсэн хардлага тэдэнд байгаа аж. Д.Сумьяабазар гишүүн энэ тал дээр “Бид ч гэсэн үүнийг мэдэрч гараар тоолох асуудал оруулсан боловч 50 хүртэлх хувийг гараар тоолох хэмжээнд хүрснийг та бүхэн мэдэж байгаа”.

Энэ үеэр тус дүүргийн нэг иргэн  “Ер нь иргэд бидний амьдрал, амжиргааг дээшлүүлж өшөө, илүү сайн сайхан ирээдүйг цогцлоогооч гэдэг үүднээс сонголтоо хийдэг. Тиймээс тэд хар машин гэж нэрлээд байгаа төхөөрөмжөөс айгаад байна” гэж ярьлаа. Мөн тус дүүргийн өндөр настнуудын төлөөлөл  “Би дөрвөн хүүхдээ их дээд сургууль төгсгөхдөө хэнээс ч юу ч гуйлгүй, өр зээл тавиагүй ганцаараа өсгөөд, төгсгөчихсөн. Гэтэл өнөөдөр миний хүүхдүүд бүгд ажилтай болчихсон байхад эдийн засаг хямарлаа гэдгээс болоод би өнөөдөр өртэй хүн болчихлоо. Иргэн байтугай улс нь өртэй болчихоод байна шүү дээ. Ийм хүнд нөхцөл байдлаас гарахын тулд хүн бүр хариуцлагатай баймаар байна.

Өргүй байвал ер нь шороон замаа явсан ч яах вэ дээ” гэв. Мөн гэр хорооллын иргэд дийлэнх нь гудамжинд гэрэлтүүлэг тавьж өгөөч гэсэн хүсэлт тавьлаа. Харин орон сууцанд амьдардаг иргэд СӨХ-ийн асуудал хэцүү байгаа хэллээ. Тодруулбал, орц хонгилийн тохижилт, лифтний насжилт дуусчихсан, тормоз байхгүй аюултай нөхцөлд амьдарч байгаа хэлж байв. Ийн УИХ-ын гишүүн Д.Сумьяабазар тойргынхоо иргэд сонгогчидтой уулзаж тэдний санал, хүсэлтийг сонссон юм.