Р.Чингисийг шалгуулахыг хүсэв
2016.03.17

Р.Чингисийг шалгуулахыг хүсэв

Шинэ төмөр замын бүтээн байгуулалтаас их хэмжээний мөнгө завшсан хэргээр шалгагдаж буй Зам тээврийн яамны Төрийн нарийн бичгийн дарга асан Б.Батзаяагийн хэрэгт УИХ-ын гишүүн Х.Баттулгыг холбогдуулан шалгаж байгаа гэх мэдээлэл бий.

Энэ асуудлаар УИХ-ын гишүүн Х.Баттулгын өмгөөлөгч Д.Пүрэвбаатар өчигдөр мэдээлэл хийлээ. Тэрээр хурлын эхэнд Х.Баттулгыг энэ хэрэгт холбогдуулж, их хэмжээний мөнгө завшсан гэх мэдээллийг үгүйсгэж, нийгэмд буруу ойлголт төрүүлж байгаа энэ асуудлыг ЦЕГ-ын дарга Р.Чингис зохион байгуулж байна гэдгийг хэлэв. Мөн энэ үеэр “Шинэ төмөр замын бүтээн байгуулалтад 93.6 тэрбум төгрөгийн ажил гүйцэтгэсэн гэдэг ч 30 орчим тэрбум төгрөгийн гүйцэтгэлийн баримт байдаг. Үлдсэн 55 тэрбум төгрөгийн ажлын баримт үлдээгүй байгаа юм.

Үүнээс болоод Төрийн өмчийн хороо, Зам тээврийн яам, “Энержи Ресурс” компанийн хооронд үл ойлголцол үүссэн. Энэ нь одоог хүртэл үргэлжилж байна. Төрийн өмчийн хорооноос анхан шатны баримтыг үзье гэхээр 96 тэрбумыг төлчихвөл бид үзүүлнэ. Үзмээр байвал “Та нар ажлын байран дээр ирээд хар” гэх мэдэгдлийг тухайн үеийн “Энержи Ресурс” компанийн захирал Батцэнгэл, Оюунбат нар явуулсан байдаг. Тэгээд очихоор “Баримт байхгүй урсгал зардалд гарсан” гэх нэрээр үзүүлдэггүй.  Би өчигдөрхөн Төрийн өмчийн хороон дээр очиж  лавлахад одоо хүртэл 55 тэрбумын баримтаа өгөөгүй байсан” гэв.

Мөн их хэмжээни мөнгө завшсан хэрэгт Х.Баттулгыг холбогдуулан мэдээлж байгаа нь ЦЕГ ын дарга Р.Чингисийн зохион байгуулж байгаа  хэрэг. Тиймээс ЦЕГ-ьн даргаар ажиллаж байгаа  Р.Чингисийг ажлаа өгч холбогдох байгууллагад шалгуулах хүсэлтэй байгаагаа илэрхийлсэн юм.