ММНБИ-иэс гишүүддээ зориулан явуулж байгаа “Мэргэжилдээ баярлалаа” аян үргэлжилсээр байна.

ММНБИ-ийн 20 жилийн ойн хүрээнд болж байгаа энэхүү аян нь гишүүдэд санхүү, бүртгэл, аудитын үйл ажиллагааны ололт амжилтыг мэдээлэх, МНБ-чид ёс зүйгээ дээдэлж гишүүний үүргээ биелүүлэх, МНБ-чид хоорондоо танилцах, бие биеэс туршлага судлах боломжийг олгож байна.  

Аяны хүрээнд Улаанбаатар хотын дүүргүүд ММНБИ-ийн нээлттэй өдөрлөг зохион байгуулж байна. ММНБИ-ийн 4000 орчим гишүүдийн 50 гаруй хувь нь Улаанбаатар хотод байдаг бөгөөд мэргэшсэн нягтлан бодогчид ажлынхаа харъяаллаар 6 дүүрэгт хуваагддаг. Энэ сарын 6-ээс эхэлсэн нээлттэй өдөрлөг Хан-Уул, Сонгинохайрхан, Чингэлтэй, Баянгол дүүрэгт боллоо. Өдөрлөгийн үеэр ММНБИ-ийн 20 жилийн ойн хүрээнд зохион байгуулах ажлуудыг танилцуулж, мэргэжлийн ололт амжилтыг дүгнэж байв.

Чингэлтэй дүүргийн зарим ахмад гишүүдээс ММНБИ-ээс үзүүлж байгаа боломжийг нягтлан бодогчид ажилдаа авч хэрэгжүүлэх, сурч боловсрох, институтийн үйл ажиллагаанд идэвхтэй оролцож, гишүүний үүргээ биелүүлж татвараа төлөх, сонин хэвлэлээ захиалахыг уриалж байлаа. 

Харин Баянгол дүүрэг ажил үйлсээрээ тэргүүлсэн, зохион байгуулсан ажилд идэвхтэй оролцдог МНБ-доо Баянгол дүүргийн 50 жилийн ойн медаль болон Улаан-Үд хотод аялах эрхийн бичгээр шагнаж урамшууллаа. 

 “Нягтлан бодогч мэргэжил бол аль ч салбарт ажиллах боломжтой мэргэжил юм.  Санхүүгийн салбарт ажиллаж байгаа та биднийг мэргэжил арга зүйн удирдлагаар хангаж, мэргэжлийн салбартаа төдийгүй олон нийтэд үйл ажиллагааг таниулсан ММНБИ-ийн хамт олондоо талархаж байна. Олон улсын зах зээлд гарч байгаа байгууллагуудын санхүү, бүртгэлийг олон улсын түвшинд нь, олон улсын стандартаар тайлагнахад бидний оролцоо чухал. Иймд бид өөрсдийгөө боловсруулах, хөгжүүлэхдээ ММНБИ-тэйгээ байнга хамтран ажиллаж, мэргэжлийн нэр хүндээ өргөж, өндөр ёс суртахуунтай байх нь чухал.” гэдгийг Хан-Уул дүүргийн нээлттэй өдөрлөгийн үеэр Төрийн сангийн дарга, МНБ М.Цогзолмаа мэргэжил нэгт нөхөддөө хэлж байсан. 

ММНБИ-ийн УЗ-ийн гишүүн Б.Түвшин “Нягтлан бодогч байгууллагын хөгжилд” сэдэвт илтгэл тавьсан. Үүнд “...1990-ээд оны эхээр манай улсад татварын болоод нягтлан бодох бүртгэлийн орчин үеийн тогтолцоо бий болж, ММНБИ байгуулагдаж, нягтлан бодох бүртгэлийг олон улсын стандартад  нэвтрүүлэх ажлууд эхэлж, үр дүнтэй болсон. Мэргэжлийн байгууллага үүсч хөгжсөнөөр манай бүртгэлийн үйл ажиллагаа дэлхийн 100 гаруй жил хөгжсөн оронтой дүйцэж, хөл нийлүүлэх болсон. Энэ бол өнөөдрийн амжилт юм. Гэхдээ бидэнд цаашид анхаарах асуудлууд байна. Бизнесийн орчин бол өрсөлдөөнтэй орчин. Ашиг их олохоосоо урт хугацаанд тогвортой байх нь гол зүйл. Хямралтай орчинд эдийн засгийн хүндрэлээс гарах асуудал бол нягтлан бодогчдын  ур чадвартай шууд холбоотой. Даяаршсан нийгэмд бид дэлхийн НББ-тэй хөл нийлүүлэхээс өөр аргагүй. Орчин үед ур чадвартай, байгууллагад үнэ цэнийг нэмэгдүүлэх, мэргэжлийн зөвлөгөө өгдөг нягтлан бодогчид хэрэгтэй. Иймд та бүхэн  бизнесийн болон шийдвэр гаргалтын, шинэ шилдэг мэргэжлийн зөвлөх, манлайлагч байж, байгууллагаа авч явах хэрэгтэй” гэдгийг тодотгож байлаа.  

Хан-Уул дүүргийн байнгын ажлын хэсгээс гишүүдээ “АПУ” ХК-ийн сүүний үйлдвэрийн үйл ажиллагаатай танилцуулж гарын бэлэг барилаа.   

Дүүргүүдийн өдөрлөгөөр ном сурах бичиг, дүүргүүдийн байнгын ажлын хэсгүүдийн танилцуулга, гэрэл зургийн үзэсгэлэн гарч, хамтлаг дуучид ая дууныхаа дээжээс өргөж байв.

ММНБИ-ийн нээлттэй өдөрлөг 4 сарын 20-нд Баянзүрх, 4 сарын 25-нд Сүхбаатар  дүүрэгт үргэлжилнэ.