УИХ дахь “Шударга ёс” бүлэг даргаа сольжээ.

Хуучин дарга Н.Батцэрэг “давхар дээл’’- тэй байсан. Тухайлбал, тэрбээр бүлгийн даргаас гадна БОНХАЖ-ын сайдын албыг хашдаг учраас аль нэг ажил орхигдох магадлалтайг хэлэх хүн цөөнгүй байсан. Тэгвэл удтал давхар дээлтэй явсан Н.Батцэрэг бүлгийн даргын ажлаа О.Баасанхүүд өгчээ. Энэ шийдвэрийг өнгөрсөн баасан гаригт хуралдсан “Шударга ёс" эвслийн бүлгийн хуралдаанаас гаргасан байна. Түүнчлэн тус бүлгийн зүгээс Үндсэн хуулийн Цэцийн 05 дугаарт дүгнэлт буюу жагсаалтаар УИХ-ын гишүүн болох нь буруу гэх шийдвэрийг хэлэлцжээ. Ингээд Цэцийн дүгнэлтийг хүлээж авах нь зүйтэй гэж үзсэн аж. Гэвч тэд энэ асуудлаар авсан завсарлагаа дуусгах нь зүйтэй гэж шийдсэн байна. Өөрөөр хэлбэл, хэдийгээр Цэцийн дүгнэлтийг хүлээж авах нь зүйтэй гэж үзсэн ч зарим асуудлыг тухайлан ярилцах хэрэгтэй гэж тооцжээ.