Булган аймгийг “улаан тойрог” гэдэг бөгөөд тус аймгийнхан Ардчилсан намаас УИХ гишүүн бараг сонгож байгаагүй. Зөвхөн 1996 онд л МоАХ ялалт байгуулж байв. Булган аймагт 1992 онд МАН-аас нэр дэвшсэн доктор Ж.Болдбаатар, С.Гүндэнбал, 2000 онд Л.Энэбиш, Ч.Раднаа, 2004 онд Ц.Цэнгэл, Ч.Раднаа, 2008 онд Ц.Цэнгэл, Э.Мөнх-Очир, 2012 онд Ё.Отгонбаяр нар УИХ-ын гишүүнээр сонгогдож байжээ.

Энэ удаагийн сонгуульд ямартай ч нэг тойрог болсон Булганаас шинэ хүн сонгогдох нь тодорхой болоод байна. АН-аас UFC группын захирал О.Амартүвшин гэгч бизнесмен залуу нэр дэвшиж байна. ТИС-ийн Компьютер, Техник Менежментийн Сургуулийг Бизнесийн удирдлагын бакалавр зэрэгтэй төгссөн тэр 2005 онд “Увс хүнс” компанийг байгуулж бизнесийн ертөнцөд хөл тавьсан. О.Амартүвшин нь Булганаас гаралтай, амжилт гаргаж яваа бизнесмен учир намынхан нь багагүй найдлага тавьж байна.

Уг нь олимпийн аварга Н.Түвшинбаяр нутагтаа дэвшинэ гэж байсан ч Х.Баттулга ах нь Баянхонгор луу чирээд явчихсан.

МАН-аас тус аймгийн МАН-ын хорооны дарга Ж.Бат-Эрдэнэ дэвшсэн. Тэр өмнө нь Зам тээвэр, Барилга хот байгуулалтын Яамны төрийн нарийн бичгийн даргаар ажиллаж байсан бөгөөд нам дотроо жигүүр, фракц байгуулж байсан идэвхитэй гишүүдийн нэг юм. Тэр бол О.Амартүвшингийн хувьд хамгийн хүчтэй өрсөлдөгч нь.

Хоёр нэр дэвшигч хоёулаа нутагтаа нэр нөлөөтэй хүмүүс. Энэ удаагийн сонгууль Булганы сонгогчид өнгө солих эсэхийг шийдэх сонгууль болно.

Булганаас УИХ-д шинэ хүн тодрох нь