Ардын намын төлөөллийг УИХ-д сонгох дуртай аймгуудын нэг нь Төв аймаг юм. Арван жилийн өмнө буюу 1996 оны УИХ-ын сонгуульд Ардчилсан холбоо эвслээс нэр дэвшсэн Д.Ганболд, Ү.Наранцэцэг нар тус тойрогт ялалт байгуулж, дөрвөн мандатын хоёрынх нь эзэн болж байсныг эс тооцвол бусад сонгуульд Ардын намынхан ялж байжээ.

Энэ удаагийн сонгуулиар Төв аймаг 28, 29, 30 гэсэн гурван тойрогт хуваагдаж байгаа бөгөөд Ардчилсан нам шинэ хүмүүсээ, Ардын нам хууччуулаа өрсөлдүүлэхээр болжээ. Үүнээс гол анхаарал татаж байгаа тойрог нь 28 дугаар тойрог.

Уг тойрогт МАН-ын дарга, УИХ-ын дэд дарга, УИХ-д дөрвөн удаа сонгогдсон, Монгол улсын Ерөнхий сайд, Шадар сайдаар ажиллаж байсан Миеэгомбын Энхболд нэр дэвшиж байна. Тэрээр нутгийнхаа тойргоос хоёр ч удаа Их Хуралд сонгогдсон.

Энэ “акулын” эсрэг Монгол Улсын Ерөнхий сайд Дашийн Бямбасүрэнгийн охин Б.Энхбайгаль Ардчилсан намаас нэр дэвшиж байна.

Энэ бүсгүйн хувьд улс төрд шинээр орж ирсэн. Гэхдээ мэдлэг чадварын хувьд хэнээс ч дутахгүй. Удирдлагын академиас ажлын гараагаа эхэлсэн тэрээр аавынхаа мэргэжлийг өвлөж, төрийн албанд 18 жил ажилласан бөгөөд Ерөнхийлөгчийн тамгын газрын дэргэдэх Үндэсний хөгжлийн хүрээлэнгийн захирлаар ажиллаж байжээ. Төрийн олон чухал бодлого, хуулийн төслийг боловсруулахад судалгааны суурийг нь тавьж өгсөн гэдгээрээ төрийн арын албаны ажлыг сайн мэдэх хүн гэж үздэг.

Сөрөг улс төрийн хүчний даргын эсрэг тулж байгаа түүний хувьд мэдлэг боловсролтой, залуу, нэр цэвэр, тэгээд бас Д.Бямбасүрэн сайдын охин гэдгээрээ ялгарах болов уу?

Хуучин улс төрчдөд итгэх итгэл алдарсан энэ үед Төв аймгийн сонгогчид бодлоо өөрчилж өнгөө солихыг хэн байг гэхэв.

29 дүгээр тойрогт МАН-аас дархан аварга А.Сүхбат, АН-аас Б.Энхсайхан, МАХН-аас Д.Батсайхан нар өрсөлдөж байна. Тэд гурвуул шинэ хүмүүс. А.Сүхбат аваргын хувьд спортыг орхисноос хойш боловсролоо дээшлүүлсний зэрэгцээ, бизнест ч амжилт гаргаж яваа. 2013 онд Ардчилсан намд элссэн. Харин одоо Б.Бат-Эрдэнэ, Д.Сумъяабазар, Кёкүшюзан Д.Батбаярын мөрөөр улс төрийн карьер хийхийг хүсч байна. Өрсөлдөгчид бүгд шинэ хүмүүс учраас сонгогдох магадлалтай өндөр гэж МАН-аас нэр дэвшүүлжээ. Хэрэв тэр сонгогдвол Монголын парламент дахь гурав дахь аварга болно.

Төв аймгийн 30 дугаар тойрогт ч бас өрсөлдөөн ширүүн байна. МАН-аас Н.Энхболд, Ардчилсан намаас Эрчим хүчний дэд сайд асан, Төв аймгийн Ардчилсан намын дарга Д.Доржпүрэв өрсөлдөж байна. Н.Энхболд энэ аймгаас гурван удаа сонгогдсон, мөн намын жагсаалтаар нэг удаа сонгогдсон хүн. Харин Д.Доржпүрэв хоёр удаа өрсөлдөөд ялаагүй ч өнгөрсөн орон нутгийн сонгуулиар намаа ялуулж чадсан, сонгогчидтой өнгөрсөн хугацаанд хангалттай тулж ажилласан хүний хувьд нэр нөлөө багагүй.

Төв аймгийнхны сонголт хийсэн түүх

2012 онд

М.Энхболд, Су.Батболд МАН

2008 онд

М.Энхболд, Н.Энхболд, Д.Дондог, Су.Батболд МАХН

2004 онд

Н.Энхболд, Д.Дондог, Ц.Сүхбаатар, Су.Батболд МАХН

2000 онд

М.Зэнээ, Ц.Өөлд, Н.Энхболд, Д.Дондог МАХН

1996 онд

Д.Ганболд, Ү.Наранцэцэг АХ эвсэл

М.Зэнээ, С.Гончиг МАХН

1992 онд

Ч.Дашдэмбэрэл, Б.Лхагвасүрэн, М.Зэнээ, М.Мэндбилэг МАХН