УИХ-ын гишүүнээр сонгогдсон нэр дэвшигчдэд СЕХ-оос гишүүний түр үнэмлэхийг өнгөрөгч баасан гарагт гардууллаа. Энэ үеэр зарим гишүүний сэтгэгдлийг сонссон юм. УИХ-ын шинэ гишүүд энэ сарын 5-ны 11.00 цагт тангаргаа өргөснөөр УИХ-ын гишүүний бүрэн эрхийн хугацаа нь эхлэх билээ.

Д.Эрдэнэбат: МАН-ын мөрийн хөтөлбөрийг өдөр бүр сануулж ажиллана /Сэлэнгэ аймгаас УИХ-д нэр дэвшч сонгогдсон/ -Сонгуулийн үр дүн бидэнд дүгнэлт хийх их зүйл байгааг санууллаа. АН-ыг зайлшгүй шинэчлэх шаардлагатай гэдгийг ойлгож байгаа учраас намын даргадаа хурлаа яаралтай хийж намаа шинэчлэх цаг болжээ гэдгийг хэлнэ. АН нийт иргэдийн 50 хувийн саналыг авсан. Үүнийг дандаа санаж явах хэрэгтэй.

Энэ удаагийн сонгууль мажоритар системээр явсан. 1996 оны салхи л дахин эргэж байна. Үнэмлэхүй олонхи болсон эрх баригчдад нэг зүйлийг дахин сануулъя. Ард түмний 50 хувийн санал ардчилагчдын талд байгаа шүү. Үүнийг өдөр бүр санаж яваарай. Бид УИХ-д есөн хүний бүрэлдэхүүнтэй болж байх шиг байна. Энэ бүлэг маргаашаас эхлэн МАН-ын мөрийн хөтөлбөрийг өдөр бүр сануулна.Энэ бол бидний хамгийн гол ажил.

Ц.Цогзолмаа: Эхчүүд, хүүхдүүдийн төлөө 13 эмэгтэй гишүүн тууштай ажиллана /Сүхбаатар дүүргээс УИХ-ын гишүүнээр сонгогдсон/ -УИХ-ын 62 дугаар тойрог буюу Сүхбаатар, Багануур дүүргийн иргэдийнхээ саналыг авч УИХ-ын гишүүнээр сонгогдож байгаадаа туйлын их баяртай байна. Нөгөө талдаа ард түмний энэ том итгэлд ямар зүтгэлээр хариу өгөх вэ гэдэг хамгийн чухал. Сонгуулийн сурталчилгааны үеэр иргэдтэйгээ уулзаж, амьдрал ахуйтай нь танилцаад явж байсан шигээ дөрвөн жилийн турш иргэдтэйгээ ойрхон ажиллана. Ялангуяа миний сонгогдсон тойрог бол дандаа гэр хороолол.

МАН-ын мөрийн хөтөлбөрийг хэрэгжүүлэхдээ иргэдийн өмнө тулгамдаж буй цэвэр усны хангамж, гэрэлтүүлэг, замын асуудлыг шийднэ. Нийслэлийн төвийн гудамжийн замыг хийсэн атлаа гэр хорооллын дундах замыг тэр чигээр нь орхисон. Нийслэлд амьдарч байгаа атлаа тоггүй байгаа асуудлыг шийдэх ёстой. Би НАМЭХ-ны Ерөнхийлөгчийн хувиар МАН-аас анх удаа 12 эмэгтэй УИХ-д сонгогдсонд баяртай байгаа. Энэ бол түүхэн амжилт. Тиймээс хүүхэд, эмэгтэйчүүд, өрх толгойлсон ганц бие эцэг, эхчүүдийн асуудлаар бид тууштай ажиллах болно.

О.Баасанхүү: Ардчиллыг хамгаалахын төлөө тууштай явна

/Орхон аймгаас УИХ-ын гишүүнээр сонгогдсон/ -МАХН-аас нэр дэвшч сонгогдсоны хувьд намын дуу хоолойг хүргэнэ. Ардчилалд аюул учирсан. Энэ нь АН-ын лидер гэгдэх зарим этгээдүүдийн хоорондын зөрчлөөс хамаарч байна. Сонгуулийн үеэр иргэдийн санал их савлалаа. Тиймээс ардчиллыг хамгаалахын төлөө тууштай явна. Ардчилсан намыг хамгаална гэдгийг хариуцлагатайгаар хэлье. Харин МАН-ыг зөвд нь дэмжиж, бурууг нь шүүмжилж ажиллана.

А.Сүхбат: Төрийг дампуурлаас гаргах ёстой /Төв аймгаас УИХ-д нэр дэвшин сонгогдсон/ -Хамгийн том зорилго бол төрийг дампуурлаас гаргах. Ард түмнийхээ амьдарлыг дээшлүүлэх байна. Ер нь гэр хорооллын ард иргэдийн амьдрал хэцүү байна шүү дээ. Энэ хэцүү байдлыг яаж засч залруулах вэ л гэдэг байна. Хэцүү цаг үеийг яаж хамтдаа даван гарах эсэх талаар бодож байгаа.

Манай намын мөрийн хөтөлбөр хүний амьдралын бүх мөчлөгт нийцсэн мөрийн хөтөлбөрийг дэвшүүлсэн. Амьдралд буусан, бүрэн хэрэгжих боломжтой мөрийн хөтөлбөр юм. Хэрэгжүүлэхийн төлөө бид хамтран ажиллах болно. Наадамдаа бэлдэн таван хүүхдийн бэлтгэл хийлгэж, бэлтгэлийг нь хангаж байгаа. Харин би наадамд зодоглохгүй.

Одоо би чинь багш хүн шүү дээ

.

Н.Учрал: Түмэн олныхоо төлөө хоёргүй сэтгэлээр зүтгэнэ /Сонгинохайрхан дүүргээс УИХ-ын гишүүнээр сонгогдсон/ -Сонгинохайрхан дүүргийн 72 дугаар тойрогт намайг дэмжиж, итгэл хүлээлгэсэн нийт сонгогчиддоо талархал илэрхийлье. Та бүгдийнхээ итгэлийг дааж, ярьснаа биелүүлэхийн зэрэгцээ намынхаа мөрийн хөтөлбөрийг хэрэгжүүлэн тус дүүргийн таван хорооны асуудлыг шийдвэрлэж, түмэн олныхоо төлөө хоёргүй сэтгэлээр зүтгэнэ. Мөн сонгуулийн үеэр намайг дэмжээгүй сонгогчид байгаа.

Цаашид тэдгээр хүмүүсийнхээ итгэлийг олж авахын төлөө ажиллана.

Н. Амарзаяа: Ард түмэн яллаа

/Өмнөговь аймгаас УИХ-ын гишүүнээр сонгогдсон/ -СЕХ-ны тогтоол шийдвэрийн дагуу миний бие УИХ-ын гишүүний түр үнэмлэхээ гардлаа. Ард түмэн ялж, сонголт нь мэргэн байв. Ард түмнийхээ сонголтыг хүндэтгэж байна. Миний хувьд аймаг, орон нутгаа хөгжүүлэх, Монгол Улсын хууль тогтоох байгууллагын бодлого шийдвэрт ард түмний төлөөлөл болж сууж байгаа нь маш өндөр үүрэг хариуцлага гэж бодож байна. Ард түмэн дотроо ойр байсан миний хувьд орон нутгийнхаа хөгжлийн төлөө хоёргүй сэтгэлээр ажиллана. Өмнөговь аймгийн хувьд мэдээж тулгамдсан асуудал их бий.

Байгалийн баялаг, ашигт малтмал ихтэй, Монгол Улсын хэмжээний томоохон үүц газар. Гэвч иргэдийн амьдрал хүнд хэцүү байгаа учраас тэр талаар илүүтэй анхаарч ажиллана. МАН-ынхан үнэмлэхүй олонхи бүрдүүлснээр мөрийн хөтөлбөр маань 100 хувь хэрэгжих боломж бүрдлээ. МАН-ын мөрийн хөтөлбөр хүн төвтэй байдаг. Нийгмийн чиглэлд илүү анхаарсан учраас миний хувьд ч гэсэн мөрийн хөтөлбөр нэг бүрийн заалтыг нутгийнхаа хөрсөнд буулгаж, хүүхэд, залуус, эхчүүд, ахмадуудынхаа төлөө ажиллах болно. Ажил хөдөлмөр эрхэлж байгаа иргэдээ ч бид анхаарч ажиллах учиртай. Иргэд манай намын мөрийн хөтөлбөрийг санал нэг дэмжиж, багаар нь ялуулсан явдалд талархаж байна.

Г.Мөнхцэцэг: Утга зохиолын салбарыг хөгжүүлнэ

/Говьсүмбэр аймгаас УИХ-ын гишүүнээр сонгогдсон/ -12 дугаар тойрог бол хоёр аймгийн 11 сумыг хамарсан маш том тойрог. Энэ удаа ард түмэн маань итгэл хүлээлгэж, асар их хариуцлага үүрүүллээ. Итгэл даахуйц төрийн төлөөлөл байж, эрч хүчтэй ажиллах болно. Мөн миний ажиллаж ирсэн утга зохиолын салбар сүүлийн жилүүдэд унаж босч явна. Тиймээс салбарынхаа хөгжлийн төлөө хоёргүй сэтгэлээр зүтгэнэ. МАН-ын мөрийн хөтөлбөр бүрэн хэрэгжинэ. Говьсүмбэр аймагт сургууль, цэцэрлэг, эмнэлгийн асуудал хүндрэлтэй байдаг. Үүнийг нь намынхаа мөрийн хөтөлбөрөөр дамжуулж өөрчилнө. Говьсүмбэр аймагт монгол түмний соёлын салбарын гал голомт болж байсан Боржигон чуулга байдаг. Тэгвэл эргээд энэ чуулгыг хөгжүүлэх, өөрийн гэсэн орон байртай болгох талаар ажиллана гэж бодож байна.

С.Жавхлан: Би нэг өдөр ч зүгээр суухгүй

/Баянзүрх дүүргээс УИХ-ын гишүүнээр сонгогдсон/ -Монголын тал нутаг, хамаг Монголд хүртэл дэлхийгээр цацсан шагай шиг байгаа ах дүүс маань хүртэл чих тавин сонсч, намайг дэмжиж байлаа. Зөвхөн монголчууд биш. Хамаг монголчууд минь сонсч байлаа гэж хэлмээр байна. Надад итгэл хүлээлгэсэн тойргийн нийт түмэн олондоо маш их баярлалаа.

Монгол дээлтэйгээ очиж, монгол сонгууль өгсөн бүх хүмүүстээ баярлалаа. С.Жавхлан ялаагүй. Монгол яллаа. Миний ярьж явдаг монгол ёс заншил яллаа. Мартагдаж байгаа соёл маань яллаа гэж хэлмээр байна. Энэ ялалт дахин олон зүйлийг ялах байх. Монголд асар их талцал үүсээд байна. Уулын ар, өврөөр нам, эвсэл, цэнхэр, улаанаараа талцаж байна. Тиймээс энэ муухай талцлыг оёж, эвцэлдүүлэх чиглэлийг барьж, ажиллах болно. Монголын төлөө бол бүгдтэй нь хамтарна.

Ганцхан би ч биш бүгдийг нь дээл өмсгөнө. Монголын төлөө ярьж хуралдаж байгаа л бол монгол ёс заншлаараа байх ёстой. Өөрөө гадаад хувцас өмсч, гадаадаас хөрөнгө оруулдаг атлаа Монголын эдийн засаг гэж ярихгүй ээ. Одоо жинхэнэ ядаргаа болно. Танай ярилцлагыг уншиж байгаа бол улстөрчид өө бүгдээрээ дээлээ өмсөнө өө гэж хэлье. Тангараг өргөх ёслол, цаашлаад хуралдаа ч монгол хувцсаа өмсөхгүй бол С.Жавхлан тэмцэнэ шүү. Би УИХ-д суугаад зүгээр суухгүй. Суусан цэцнээс явсан тэнэг дээр гэдэг дээ. Ард түмнийхээ дунд явж ажиллана. Уран бүтээлээ ч орхихгүй.

Төр түших 76 эрхэм түр үнэмлэхээ гардаж авлаа