УИХ-ы гишүүн: О.Баасанхүү:
2016.12.08

О.Баасанхүү: Төрийн нэр барьсан төрийн бус байгууллагын хулгайч нарыг болиулах хэрэгтэй

Өнөөдөр УИХ-ын чуулганы нэгдсэн хуралдаанаар “Нийгмийн даатгалын үндэсний зөвлөлийн бүрэлдэхүүнийг шинэчлэн батлах тухай” УИХ-ын тогтоолын төслийг хэлэлцлээ. Уг тогтоолын төслийг хэлэлцэж байх үеэр УИХ-ы гишүүн О.Баасанхүү үг хэлж, асуулт асуулаа.  

УИХ-ын гишүүн О.Баасанхүү

Одоогийн Үндэсний зөвлөлийн гишүүдийн үүрэг, оролцоо сул, байгаа үгүй нь мэдэгдэхгүй байсан. Тийм учраас шинээр томилогдож буй гишүүд дорвитой ажилламаар байна. Учир нь өндөр насны тэтгэврийг буруу тогтоосон, нас барсан хүмүүсийн нэр дээр мөнгө авсан гэх зэргээр хэл ам нилээн гарсан. Тухайн үед Хүн амын хөгжил, нийгмийн хамгааллын сайд асан С.Эрдэнэ нийгмийн даатгалын салбарынхныг гүтгэж байна, ор үндэслэлгүй мэдээлэл гэж хамгаалж байсан шүү дээ.

Нийгмийн даатгалын сан бол сайдын өмч биш. Тиймээс ард түмний мэдлийн санг төлөөлж байгаа гэдгээ ойлгох хэрэгтэй. Намын даалгавраар уг үүрэгт ажилд томилогдож байгаа мэтээр битгий хандаарай. Яагаад ингэж хэлж байна гэвэл Ц.Сүхбаатарыг намын даалгавраар томилогдох гэж байна гэж бодлоо. Учир нь өнгөрсөн жилүүдэд энэ хүн Ахмадын холбоог хоёр хуваасан.

Өнөөдөр Ахмадын холбоо гэж төрийн бус байгууллага нэртэй төрийн байгууллага ч  юм шиг болж хувираад байна. 

УИХ-ын гишүүн С.Чинзориг: 

"Хуульд Нийгмийн даатгалын үндэсний зөвлөлд Засгийн газар, ажил олгогч, ажилтны эрх ашгийг хамгаалсан төлөөлөл тус тус орно гээд заасан. Шинээр томилогдож буй дөрвөн хүний хоёр нь Үйлдвэрчний эвлэлийн байгууллагыг төлөөлж байна.

Нөгөө хоёр нь ажил олгогчдын төлөөлөл юм. Ц.Сүхбаатарыг намын даалгавраар оруулж ирсэн хүн гэж бодохгүй байна. Энэ хүн ажилтнуудын эрх ашгийг хамгаалах төлөөлөл болж Үндэсний зөвлөлд багтах юм."