Өнөөдөр, маргаашийн УИХ-ын чуулганы нэгдсэн хуралдаанаар 6 асуудлыг хэлэлцэн шийдвэрлэнэ. Эдгээр асуудлын тоонд Гэр бүлийн хүчирхийлэлтэй тэмцэх тухай, Хөгжлийн банк, Оффшор бүстэй холбоотой хууль, тогтоолын төслүүд багтаж байгаа нь чуулганы хуралдааны халуун сэдэв болж байна.

Хэлэлцэх асуудлын дарааллын эхэнд "Гэр бүлийн хүчирхийлэлтэй тэмцэх тухай" хуулийн шинэчилсэн найруулгын төсөл багтаж байна.

Монгол Улсын Засгийн газраас 2016 оны 9 дүгээр сарын 9-нд “Гэр бүлийн хүчирхийлэлтэй тэмцэх тухай” хуулийн шинэчилсэн найруулгын төслийг өргөн барьсан билээ.

Засгийн газраас анх оруулж ирсэн хуулийн төсөлд засч, сайжруулах зүйлс байна гэж үзээд 2016 оны 9 дүгээр 30-ны өдөр УИХ-ын гишүүн Н.Оюундариар ахлуулсан, Х.Нямбаатар, Д.Оюунхорол, Б.Ундармаа нарын 6 гишүүний бүрэлдэхүүнтэй ажлын хэсэг УИХ-аас томилогдсон.

Өнгөрсөн долоо хоногт анхны хэлэлцүүлгийг хийх явцад 103 зарчмын зөрүүтэй саналаар санал хураасны дийлэнх нь найруулга, редакцийн шинжтэй засварууд байсан гэж болно.

Уг хуулийн төслийг 3 сар гаруй хугацаанд хэлэлцсэний эцэст өнөөдөр УИХ-ын чуулганы хуралдаанаар эцсийн хэлэлцүүлгийг хийх гэж байна.

УИХ-аар эцсийн хэлэлцүүлэг хийнэ гэдэг нь уг хуулийн төслийг бүхэлд нь баталья гэсэн саналын томьёоллоор санал хураана гэсэн үг. Нийгэмд хүлээлт үүсгэсэн уг хуулийн төслийг УИХ-ын гишүүд дэмжих болов уу гэж бодож байна.

Чуулганы хуралдаанаар хэлэлцэх бусад асуудлын тухайд Оффшор бүсэд данс эзэмших, хуулийн этгээд байгуулахыг хориглосон зүйл заалт бүхий хуулийн төсөл дарааллын хоёрт орж байна. Монгол Улсын Хилийн тухай болоод энэ хуулийн төслийн анхны хэлэлцүүлгийг хийнэ.

Мөн Хэрэглэгчийн эрхийг хамгаалах тухай хуулийн шинэчилсэн найруулгын төслийн хэлэлцэх эсэхийг шийднэ.

Монгол Улсын Хөгжлийн банкны талаар авах зарим арга хэмжээний тухай УИХ-ын тогтоолын төслийг хэлэлцэх нь чуулганы халуун сэдвүүдийн нэг юм.

Уг тогтоолын төслийг хэлэлцэх асуудлын дараалал харгалзахгүй, нэн яаралтай оруулж ирж байгаа бөгөөд өнөөдөр хэлэлцэх эсэхийг шийдэж, маргааш эсвэл ирэх 7 хоногийн энэ өдөр анхны хэлэлцүүлгээр батлах болов уу гэсэн таамаг байна.

Баасан гарагийн чуулганы нэгдсэн хуралдаанаар сайдын мэдээлэл сонсдогийн дагуу энэ удаад УИХ-ын гишүүн Х.Нямбаатарын Хууль зүй, дотоод хэргийн сайдад тавьсан асуулгын хариуг сонсох юм байна. Уг асуулга нь Хууль тогтоомжийн тухай хуулийн бэлтгэл ажлын хэр базааж байгаа явцын тухай болно.

Өөр нэг зүйлийг онцлоход УИХ-ын дарга М.Энхболд гадаад томилолттой байгаа учраас УИХ-ын дэд дарга Ц.Нямдорж энэ 7 хоногийн чуулганы нэгдсэн хуралдааныг даргалах юм.

Энэ 7 хоногийн чуулганы халуун сэдэв Хөгжлийн банк, оффшор бүс байх болно