УИХ-ын нэгдсэн чуулганы үдээс өмнөх хуралдаанаар Хөгжлийн банкны тухай өргөн барьсан хуулийн төслийн талаар хаалттай хуралдах тухай санал авсан. Гишүүдийн дийлэнх хаалттай хуралдахыг дэмжсэнгүй. Энэ үеэр УИХ-ын гишүүн О.Баасанхүү асуулт асууж, санал хэллээ.

УИХ-ын гишүүн О.Баасанхүү:

Хамтарсан засгийн үед Сангийн яам АН,МАН-хоёрын мэдэлд байсан. Манайд ердөө 6-хан банк үйл ажиллагаа явуулж байгаа. Би дахиад л нийлүүлэлт хангалттай хийсэн байхад долларын ханш яагаад буурахгүй байна вэ гэдэг асуултыг тавих гэж байна.

1.5 тэрбумаас эхлүүлээд 200 саяас бусдыг нь төгрөгөөр нийлүүлчихсэн гэж байгаа. Тэр их ам долларыг идчихмээргүй юм. Тэгэхээр гадагшаа гаргасан байх уу эсвэл яасан байх уу? Энэ тухайгаа ард түмэнд тодорхой хариултыг өгөх цаг нь болсон гэдгийг хэлье.

Тэр үед нь ам доллар нийлүүлж байсан бол одоо ч ам доллараар зээл өгөөд тэр хүмүүс нь ч доллараар зээлээ төлөөд явсан бол харьцангуй алдагдал бага байх байсан биз. Энэ дундаас арилжааны банкууд зөрүүгээ аваад хожиж үлдээд байна гэсэн үг.

Он дуусч 12 дугаар сарын 31-нд банкууд хаачихвал өр төлбөрөө яаж төлөх болж байна?

Цаашид өр төлбөрүүд төлөгдөх үү үгүй юу эсвэл энэ үеийг ашиглаад хүчингүй болгох гээд байна уу?

Мөн хөгжлийн банк ард түмний нэр барьж хууль зөрчсөн зүйл байгаа бол түүнд хариуцлага хүлээлгэх ёстой юм. Өмнөх Сангийн сайдууд яагаад хариуцлага үүрэхгүй байгаа юм бэ гэдгийг асуумаар байна? Одоогийн Ерөнхий сайд, Ч.Улаан гишүүн нар өмнөх Сангийн яамны сайд хийж байсан эдгээр хүмүүст яг ямар хариуцлага үүрүүлэх гэж байна?

АН эрх барьж байх өмнөх жил Хөгжлийн банкнаас МАН 60 хувийн зээл авсан гэдгийг тэд хэлсэн. Сонгуулийн сурталчилгаагаа манай хоёр нам онгоцоор нисэж хийж байсныг ард түмэн мэдэж байгаа байх.

Танай хоёр намын дарга нар онгоцны сурталчилгаа хийж байгаа мэт холхиж байсан даа. Тэр бүхний цаана урсаж байсан мөнгөө хаанаас авч байсан тухайгаа тодорхой хариулт өгөхгүй юу?

Сангийн сайд Б.Чойжилсүрэн: Хөгжлийн банкнаас авсан бүх зээлийг эргэн төлүүлэхээр ажиллаж байна

"Өнгөрсөн дөрвөн жилийн хугацаанд Ардчилсан нам танай МАХН хоёр хамтран засгийн эрх барьж байх үедээ тавьсан их өрийн дарамттай эдийн засгийн бүтцийг бий болгочихсон.

Төлбөрийн тэнцэлийн дарамт жил тутам нэг тэр бумаас доошгүй хэмжээнд байгаа. Ийм л төлбөрийн дарамттай эдийн засгийн бүтэц бий болчихоор интервэнц хийгээд ч долларын ханш буухгүй байгааг хэлье. Өнгөрсөн дөрвөн жилийн хугацаанд 7 их наяд 954 тэр бум төгрөгийг Монгол банкнаас мөнгө хэвлэж зах зээлд их хэмжээгээр нийлүүлсэнээс болж долларын эрэлт бий болсон.

Ингээд Вальютын эрэлтийг хангахын тулд бараг 105 гаруй тэрбум долларыг интервенц хийхэд зарцуулаад байна. Энэ бүхнээс үүдээд долларын ханшийг барьж чадахгүйд хүрээд байна.

Долларын ханш буурахгүй гэдэг асуудал манай нам засгийн эрх барих энэ үед сөхөхдөж байгаа мэт боловч эх үндэс нь өмнөх дөрвөн жилд эрх барьж байсан АН,МАХН-ын хамтарсан засгийн хийсэн ажлын үр дүн юм.

Өр төлбөрийг нь хэн хариуцах вэ гэж байна. Энэ банкнаас авсан зээлүүдийг бид бүгдийг нь эргэн төлүүлэх талаар арга хэмжээ авч байна.

Та бүхнийг засаг барьж байх үед бий болгосон замбараагүй зээлийг буцааж, цэгцлэх зорилгоор энэ тогтоолын төслийг оруулж ирсэн юм. Хөгжлийн банкны удирдлагуудад Засгийн газраас хатуу шаардлага хүргүүлж үүрэг өгч ажиллаж байгаа."

О.Баасанхүү: Хөгжлийн банк ард түмний нэр барьж хууль зөрчсөн нөхдүүдэд ямар хариуцлага хүлээлгэх вэ?