УИХ-ын чуулганы нэгдсэн хуралдаанаар /2017.01.19/ Диплома албаны тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийлээ.

Хэлэлцүүлгийн эхэнд УИХ-ын гишүүн Н.Оюундарь хуулийн төслийн талаарх Аюулгүй байдал, гадаад бодлогын байнгын хорооны санал дүгнэлтийг танилцуулсан юм.

УИХ-ын гишүүн Н.Оюундарь:

"Монгол Улсын Засгийн газраас 2016 оны 12 дугаар сарын 22-ны өдөр өргөн мэдүүлсэн Дипломат албаны тухай хуульд нэмэлт, өөрчлөлт оруулах тухай хуулийн төслийн хэлэлцэх эсэх асуудлыг УИХ-ын чуулган нэгдсэн хуралдаанаар 2017 оны нэгдүгээр сарын 6-ний өдрийн хуралдаанаараа хэлэлцэж, анхны хэлэлцүүлэгт бэлдүүлэхээр Аюулгүй байдал, гадаад бодлогын байнгын хороонд шилжүүлсэн билээ.

Аюулгүй байдал, гадаад бодлогын байнгын хороо 2017 оны 01 тоот тогтоолоор уг хуулийн төслийг УИХ-ын чуулганы нэгдсэн хуралдаанд бэлдүүлэх ажлыг хангах, санал дүгнэлтийн төсөл боловсруулах үүрэг бүхий ажлын хэсгийг байгуулсан бөгөөд ажлын хэсгийн ахлагчаар УИХ-ын гишүүн Н.Оюундарь, гишүүдэд УИХ-ын гишүүн Л.Болд, А.Ундраа, Б.Энх-Амгалан, Н.Энхболд нар ажилласан.

Аюулгүй байдал, гадаад бодлогын байнгын хороо 2017 оны нэгдүгээр сарын 18-ны хуралдаанаар хуулийн төслийн анхны хэлэлцүүлгийг хийж, хуулийн төсөлтэй холбогдуулан ажлын хэсгээс гаргасан саналуудыг хэлэлцэн, саналаа нэгдсэн хуралдаанд оруулж байна.

- Дипломат төлөөлөгчийн газар ажиллах ажилтны эхнэр/нөхөр нь төрийн албан хаагч бол томилолтын хугацаа дуусгавар болж, эх орондоо бүрмөсөн ирэхэд ажил олгогч ажлын байраар хангах, ажил олгогч нь татан буугдсан, өөрчлөн байгуулагдсан эсвэл өөрөөс нь үл хамаарах шалтгаанаар орон тоо цөөрсөн, хасагдсан тохиолдолд тухайн асуудлыг Төрийн албаны тухай болон Хөдөлмөрийн тухай хуулиар зохицуулах

- Төрийн болон нутгийн захиргааны байгууллага, түүний нэгж, салбар, төлөөлөгчдийн газрыг гадаад улсад байгуулах, төлөөлөгч томилон ажиллуулах асуудлыг Монгол Улсын хууль, олон улсын гэрээнд өөрөөр заасан бол гадаад харилцааны асуудал эрхэлсэн төрийн захиргааны төв байгууллагаас зөвшөөрснөөс бусад тохиолдолд хориглох

- Дипломат ажилтны суугаа орны сургуулийн өмнөх боловсролын сургалт төлбөртэй бол хүүхдийнх нь сургалтын төлбөрийг тухайн улсын сургалтын дундаж зардлын 70 хувиар тооцон олгох

- Монгол Улсаас гадаад улсад суух Онц бөгөөд Бүрэн Эрхт Элчин сайд, НҮБ-ын дэргэд суух байнгын төлөөлөгчийг болон олон улсын бусад байгууллагын дэргэд суух байнгын төлөөлөгч нь гадаад улсад суух Онц бөгөөд Бүрэн Эрхт Элчин сайдын үүргийг хавсран гүйцэтгэх тохиолдолд түүнийг Монгол Улсын Ерөнхийлөгч хуульд заасны дагуу томилж, эргүүлэн татах

- Дипломат төлөөлөгчийн газар ажиллах дипломат ажилтны ажиллах хугацааг 3 жил байсныг 4 жил болгох, уг өөрчлөлт энэхүү хуулийн төсөл батлагдсан тохиолдолд хүчин төгөлдөр мөрдөж эхлэх, 2017 оны зургадугаар сарын 1-ний өдрөөс өмнө Дипломат төлөөлөгчийн газар томилон ажиллаж буй дипломат ажилтанд хамаарахгүй байхаар тус тус өөрчлөлт оруулсан.

Дипломат албаны тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийсэн талаарх Байнгын хорооны санал дүгнэлт болон зарчмын зөрүүтэй саналын томьёоллыг хүргүүлж байна."

Н.Оюундарь: Дипломат ажилтны ажиллах хугацааг 3 жил байсныг 4 жил болгох саналтай байна