УИХ-ын чуулганы нэгдсэн хуралдаанаар Эрдэнэт үйлдвэр болон Монросцветмет ХХК-ийн талаар авах зарим арга хэмжээний тухай УИХ-ын тогтоолын төслийг нээлттэй хэлэлцэж байна. 

Хэлэлцүүлгийн үеэр УИХ-ын гишүүн О.Баасанхүү ОХУ-ын Ростех компаниас ирсэн гэгдэх захидлыг үзэж хэрэгтэй гэлээ. 

Medee.mn сайтад Монгол Улсын Ерөнхийлөгч өөрийн твиттер хуудаснаа Хууль зүйн байнгын хорооны саналын эсрэг байр суурь илэрхийлсэн гэж бичсэн байна. Өөрөөр хэлбэл хувийн компани гэдэг чинь ард түмэн биш юм уу гэсэн агуулгатайгаар жиргэсэн гэж байгаа юм.

УИХ-ын дэд дарга Ц.Нямдорж: “Эрдэнэт үйлдвэрийн 49 хувийг худалдан авах ажиллагааг зохион байгуулсан хүн нь Ц.Элбэгдорж өөрөө” гэж мэдэгдэж байсан л даа.

Бидний өнөөдөр хүчингүй болгохоор хэлэлцэж буй УИХ-ын 330 дугаар тогтоолын цаад утга нь яагаад Эрдэнэт үйлдвэрийн 49 хувийг худалдан авах тухай асуудлыг УИХ-аар хэлэлцүүлээгүй вэ гэдэг асуулт урган гараад байгаа шүү дээ. Ч.Сайханбилэгийн хэлдгээр үнэхээр цаг хугацааны хайчинд орсон юм уу эсвэл үнэхээр хууль бусаар худалдсан эсэхийг мэдмээр байна.

Саяын байнгын хорооны хуралдаанаар нилээд ноцтой гэж хэлж болох зүйл хэлсэн нь ОХУ-ын Ростех компаниас захидал ирсэн тухай асуудал юм. Хэрэв уг захидал нууцын зэрэглэлтэй биш, нууцын зэрэглэлтэй мөн байсан нууцын горимоор нь гишүүдэд уг асуудлыг тараах хэрэгтэй гэж үзэж байна.

Яагаад ОХУ-ын Ростех компани бидэнд хандаж захидал илгээв гэдгийг мэдэх ёстой. Бидний одоо гаргах гэж буй шийдвэр бол нэг талаас, ард түмнийхээ өмнөөс Эрдэнэт үйлдвэрийн 49 хувийг төрийн өмчлөлд шилжүүлж, 100 хувь улсын үйлдвэрийн статустай болгох гэж байгаа боловч нөгөө талаас бид өрөнд орчих вий гэж болгоомжилж байна.

Ний нуугүй хэлэхэд, уг асуудлыг Арбитраар шийдүүлмээргүй байна. Эрдэнэт үйлдвэрийн асуудлаар тасралтгүй үргэлжлэх шүүх хурал, маргаанаас болж, ард түмнийг ядраах хэрэгүй. Тиймээс тэр захидал УИХ-ын шийдвэрт нөлөөлөхүйц эсэхийг гишүүд мэдэх ёстой гэж бодож байна.