2017 оны 2 дугаар сарын 10-ны Улсын их хурлын чуулганаар “Эрдэнэт үйлдвэр” ХХК, “Монголросцветмет” ХХК-ийн талаар авах зарим арга хэмжээний тухай УИХ-ын тогтоолын төслийг хэлэлцлээ.

Тогтоолын төсөлтэй холбогдуулан гишүүд асуулт асууж үг хэллээ.

УИХ-ын гишүүн Б.Бат-Эрдэнэ: "2015 онд Ч.Сайханбилэгийг Дубайн гэрээг байгуулчхаад ирэхэд нь огцруулах ёстой байсан. Тэгсэн бол ийм байдалд хүрэхгүй байсан" гэлээ.

УИХ-ын гишүүн О.Содбилэг: Хувийн хэвшил Эрдэнэтийг авах нь буруу биш. Хууль зөрчигчид нь тухайн үеийн эрх баригчид юм. тухайлбал төрийн 3 өндөрлөг. Яагаад ҮАБЗөвлөл хуралдаагүй юм бэ. Эрдэнэт бол жижигхэн ААНэгж биш.

УИХ-ын гишүүн О.Баасанхүү: Бидний өнөөдөр хүчингүй болгохоор хэлэлцэж буй УИХ-ын 330 дугаар тогтоолын цаад утга нь яагаад Эрдэнэт үйлдвэрийн 49 хувийг худалдан авах тухай асуудлыг УИХ-аар хэлэлцүүлээгүй вэ гэдэг асуулт урган гараад байгаа шүү дээ. Ч.Сайханбилэгийн хэлдгээр үнэхээр цаг хугацааны хайчинд орсон юм уу эсвэл үнэхээр хууль бусаар худалдсан эсэхийг мэдмээр байна.

УИХ-ын гишүүн Д.Эрдэнэбат: Улстөрөөр ял тогтоож, бусдын өмчийг төр дээрэмдэж байна. Өнөөдөр ийм юм болж байгаад би үнэхээр харамсаж байна. Үүн дээр хүний өмчид хандах үзэл бодлын зөрүү харагдаж байгаа юм. Би шууд л хэлнэ. Энэ бол Улстөрөөр ял тогтоож, бусдын өмчийг төр дээрэмдэж байгаа явдал гэж үзэж байна.

УИХ-ын гишүүн Н.Учрал: Эрдэнэт үйлдвэрийн 49 хувийг худалдан авсан асуудлыг Монгол Улс дотооддоо шийдэх ёстой. Энэ бол олон улсын шүүхээр хэлэлцэх маргаан биш.

Ийнхүү гишүүд асуулт асууж үг хэлсний дараа МУ-ын Ерөнхийлөгч мэдээлэл хийсний дараа УИХ-ын тогтоолын төслийг батлая гэсэн саналын томьёоллоор санал хурааж, гишүүдийн 80,3 хувийн дэмжлэгээр тогтоолын төсөл батлагдлаа.

Эрдэнэт үйлдвэрийн 49 хувийг төрийн эзэмшилд авахыг гишүүдийн олонх дэмжиж, тогтоолын төсөл батлагдлаа