Учир нь даатгалын мэргэжлийн оролцогчид тэр дундаа даатгалын компаниудын үзэж байгаагаар жолооч нар хуурамч даатгалын тохиолдол гаргах, даатгалын тохиолдол гарлаа гэхэд учирсан хохирлыг хэт давуулан үнэлэх гээд олон зөрчил гардаг гэдэг.
Тэгвэл энэ байдлыг таслан зогсоох, даатгалын мэргэжлийн оролцогчид хийгээд даатгалын тохиолдол гаргасан жолооч нарын хооронд хардлага, үл ойлголцол, маргаан гарахаас урьдчилан сэргийлэх, даатгалаа ашиглан хууль бусаар орлого олох сонирхолтой этгээдэд хариуцлага тооцох зорилгоор Эрүүгийн хуульд дараах нэмэлтийг оруулах нь зүйтэй гэж хууль санаачлагч үзжээ. Үүнд,
Зохиомол байдлыг зориудаар бий болгох, бодит байдлыг нуух, даатгалын тохиолдлын бодит байдал, хохирлын хэмжээг худал мэдээлэх, хуурамч баримт бичиг бүрдүүлэх замаар даатгалын нөхөн төлбөр авсан бол,
Энэ гэмт хэргийг албан тушаалын байдлаа ашиглаж, бүлэглэн, их хэмжээний даатгалын нөхөн төлбөр авч үйлдсэн бол,
Хууль бусаар даатгалын нөхөн төлбөр авах гэмт хэргийг хуулийн этгээдийн нэрийн өмнөөс, хуулийн этгээдийн ашиг сонирхлын төлөө үйлдсэн бол хуулийн этгээдийн тодорхой төрлийн үйл ажиллагаа явуулах эрхийг хасаж, арван мянган нэгжээс наян мянган нэгжтэй тэнцэх хэмжээний төгрөгөөр торгоно гэж хуулийн төсөлд тусгажээ.
