Приус машины татварыг хөнгөлөх хуулийн төслийг хэлэлцэхээр шийдлээ
Өнөөдөр /2017.05.31/ УИХ-ын нэгдсэн чуулганаар Онцгой албан татварын тухай хуульд нэмэлт, өөрчлөлт оруулж хос тэжээлт, цахилгаан хөдөлгүүрт болон хийгээр ажилладаг автомашины татварыг 0-50 хүртэл хувиар тогтоох хуулийн төслийг хэлэлцсэн юм.
Монгол Улсын 2017 оны төсвийн тухай хуульд нэмэлт, өөрчлөлт оруулах тухай хуулийг дагаж батлагдсан Онцгой албан татварын тухай хуульд нэмэлт, өөрчлөлт оруулах тухай хуулиар хос тэжээлт, цахилгаан хөдөлгүүрт болон хийгээр ажилладаг автомашины онцгой албан татварыг 50 хувиар хөнгөлөх хууль гаргаад байсан.
Харин онцгой албан татвар төлдөггүй байсан эдгээр автомашинд дээрх хуулийн дагуу 375.000-6.675.000 төгрөгийн татвар ногдохоор болсон нь ялангуяа манай улсад хамгийн их эрэлт хэрэгцээтэй байгаа хос тэжээлт буюу “Приус” машины хэрэглэгч, борлуулагчдад эдийн засгийн урьдчилан тооцоолоогүй, огцом дарамт үүсэх асуудал үүсээд байсан юм.
Иймд хос тэжээлт, цахилгаан хөдөлгүүрт болон хийгээр ажилладаг автомашины татварыг 0-50 хүртэл хувиар тогтоох хуулийн төслийг оруулж, УИХ-ын гишүүд байр сууриа илэрхийллээ.
УИХ-ын гишүүн Л.Болд: Нэг удаагийн буцаалт хийх арга хэмжээ хэрэгжих үү, эсвэл байнга татварын хөнгөлөлт, чөлөөлөлт үйлчлэх үү? Бид Япон улстай чөлөөт худалдааны хэлэлцээр байгуулагдаад явж байгаа. Яагаад анхнаасаа үүнтэй зөрчилдсөн шийдвэр оруулсан юм бэ? Ардчилсан намын бүлгээс тухайн үедээ приүс машины татварт хамрагдаж байгаа нь буруу гэдгийг анхааруулж байсан. Цаашдаа үүнийг олон нийтэд зөв ойлголт төрүүлэхгүй бол үнэхээр зөвхөн нэг удаагийн арга хэмжээ яваад байна уу, эсвэл байнгын үйлчлэх хуулийн төсөл үү гэдгийг тайлбарлаж өгөхийг хүсч байна.
М.Оюунчимэг: Засгийн газар татвартай холбоотой иргэдийн хүсэн хүлээж байгаа энэ асуудлыг шийдэж, татварын хөнгөлөлт үзүүлж байгаад талархалтай хандаж байна. Харин татвар нэмэх нэрийдлээр приүс машины үнэ саяаас дээш төгрөгөөр нэмэгдсэн. Татварын хөнгөлөлт төрөөс үзүүлж байхад эцсийн хэрэглэгч дээр очихдоо машины худалдаачид үнээ буцаагаад буулгах тал дээр ямар хяналт тавих хэрэгтэй. Бизнес эрхлэгчдийн хүсэлтийн дагуу гишүүд санаачилга гаргаж, татварын хөнгөлөлтөө үзүүлж байна шүү дээ.
Энэхүү хуулийн төслөөр дээр дурдсан автомашинд ногдуулах онцгой албан татварыг Засгийн газар тогтоох боломжтой болох тул 5 дугаар сарын 01-ний өдрөөс хуулийн төсөл батлагдах хүртэл хугацаанд хос тэжээлт, шингэрүүлсэн хийгээр ажилладаг, цахилгаан тэжээлт автомашинд ногдуулсан албан татварыг татвар төлөгчид буцаан олгохоор заажээ.
