УИХ-ын гишүүн, УИХ-ын НББСШУ-ны байнгын хорооны дарга Ё.Баатарбилэг 12 дугаар сарын 09-11-ний өдрүүдэд Архангай аймагт ажиллалаа.

Байнгын хорооны даргыг дагалдан Хөдөлмөр, нийгмийн хамгааллын дэд сайд С.Мөнгөнчимэг, БСШУС-ын яамны Сургуулийн өмнөх боловсролын бодлогын газрын дарга С.Болормаа, ХХААХҮ-ийн яамны Жижиг, дунд үйлдвэрлэл, хоршооны бодлогын хэрэгжилтийг зохицуулах газрын дарга Д.Дондогдорж,   ЭМ-ийн яамны Эмнэлгийн тусламжийн газрын дарга Я.Буянжаргал, Авто тээврийн Үндэсний төвийн захирал П.Дэлгэрнаран, УИХ-ын НББСШУ-ны байнгын хорооны Ажлын албаны ахлах зөвлөх Л.Лхагвасүрэн, зөвлөх Р.Болормаа болон албаны бусад хүмүүс ажилласан.

Аймгийн удирдлагуудтай уулзаж, өвөлжилтийн бэлтгэл ажлын талаар товч мэдээлэл сонсов

Аймгийн Засаг дарга Ц.Мөнхнасан өвөлжилтийн бэлтгэл ажлын талаар товч мэдээлэл хийв.

Тэрбээр “Аймгийн 19 сумын 101 багийн 7105 хот айлд 17.1 мянган малчин болон мал бүхий өрхөд 5.6 сая толгой малыг өвөлжүүлж, хаваржуулах бэлтгэл зохион байгуулалтыг ханган ажиллаж байна. Энэ жилийн хувьд 500 тонн өвс, 100 гаруй тонн тэжээл бэлдсэн. Суурин газрын өвөлжилтийн бэлтгэл ажил ч мөн үндсэндээ хангагдаад байна” гэлээ.

Үргэлжлүүлэн аймгийн удирдлагууд тулгамдаж буй асуудлаа байнгын хорооны даргыг дагалдан ирсэн яамдын холбогдох албан тушаалтнуудад танилцуулж, шаардлагатай төсөв хөрөнгийг шийдэх тал дээр анхаарлаа хандуулж ажиллахыг хүссэн юм.

Архангай аймгийн “Авто тээврийн төв”-ийн шинэ барилгыг хүлээн авах ажиллагаанд оролцлоо

Тус автовокзал, тээврийн хяналтын үзлэгийн төвийг Авто тээврийн Үндэсний төвийн хөрөнгө оруулалтаар барьсан аж.

Архангай аймгийн “Авто тээврийн төв”-ийн шинэ барилга ашиглалтад орсноор 20-30 хүн шууд ажлын байртай болж, зорчигчдын ая тухыг хангасан хүлээлгийн танхим, амрах өрөө, үйлчилгээний төв үйл ажиллагаа явуулах нөхцөл бүрдлээ гэж аймгийн удирдлагууд онцолсон.

Энэ үеэр байнгын хорооны дарга Ё.Баатарбилэг хэлсэн үгэндээ “Архангай, Хэнтий аймагт орчин үеийн авто тээврийн үзлэг оношилгоог хийх цогц төвүүд ашиглалтад орж байна. Баруун бүсэд зорчих иргэдийн тав тухтай байдлыг хангасан төвийн үйл ажиллагаа жигдрээд эхлэхээр Архангай аймгийн эдийн засагт үр өгөөжөө өгч, иргэдийн орлого нэмэгдэх, Цэцэрлэг-Мөрөнгийн чиглэлд улирлын аялал жуулчлалыг хөгжүүлэх таатай орчин бүрдэж байна” хэмээн онцоллоо.

Аймгийн иргэд, хөдөлмөрчдийн төлөөлөлтэй уулзалт хийв

Байнгын хорооны дарга дараа нь Архангай аймгийн иргэд, хөдөлмөрчидтэй уулзалт хийлээ.

Уулзалтын эхэнд тэрбээр УИХ-аас хэлэлцэн баталсан 2018 оны төсвийн талаар товч танилцуулга хийв.

Дараа нь иргэд санал бодлоо илэрхийлж, асуулт асуув.

Архангайн иргэд нэмэгдэж буй ядуурлыг бууруулах, жижиг, дунд үйлдвэрийг дэмжих чиглэлд өгч буй гарааны санхүүжилтын хэмжээг нэмэгдүүлэх, ерөнхий боловсролын сургуулийн багш нарын мэдлэг, ур чадварыг дээшлүүлж, бүтээмжид суурилсан цалингийн тогтолцоог нэвтрүүлэх зэрэг асуудлыг хөндөж байлаа.

Иргэдийн тавьсан асуултад холбогдох яамдын албан тушаалтнууд дэлгэрэнгүй хариулт өгсөн юм.

Уулзалтын төгсгөлд байнгын хорооны дарга Ё.Баатарбилэг дээрх асуудлуудад анхаарлаа хандуулж ажиллахаа амласан.

“Элэгний эмгэггүй Архангай” төслийн багийн гишүүдтэй уулзав

УИХ-ын гишүүн, УИХ-ын НББСШУ-ны байнгын хорооны дарга Ё.Баатарбилэгийн санаачилгаар Архангай аймгийн хүн амын вирүст хепатитын шалтгаант элэгний өвчлөл, эндэгдлийг бууруулах зорилготой “Элэгний эмгэггүй Архангай” төсөл хэрэгжиж байгаа билээ.

Төслийн хүрээнд 40-65 насны 21700 иргэний 81.3 хувь буюу 17594 хүнийг С вирусын эрт илрүүлэг шинжилгээнд хамруулснаас 3449 иргэн буюу 19.5 хувь нь С вирустай болох нь батлагдсан байна. Өнөөдрийн байдлаар С вирус илэрсэн 1644 хүнийг С вирусын эмчилгээнд хамруулснаас 732 хүн эмчилгээгээ дуусгаж, 3 удаагийн шинжилгээнд орсон 112 хүн бүрэн эдгэрсэн гэж уулзалтын эхэнд Архангай аймгийн Эрүүл мэндийн газрын дарга Р.Гандиймаа хэлэв.

Тэрбээр “Өнгөрсөн 09 дүгээр сарын 09-ны өдөр “Элэгний эмгэггүй Архангай 2” төслийг албан ёсоор эхлүүлсэн. Манай сум, өрхийн эрүүл мэндийн төвүүдийн дотрын эмч болон лаборант нарт С вирусын илрүүлэг шинжилгээг зохион байгуулах арга зүйн сургалт явуулж, оношлогооны урвалж болон дагалдах материалыг тараасан. Энэ хүрээнд зорилтот бус насны 18-40, 65-аас дээш насны иргэдийг элэгний В, С вирусын шинжилгээнд хамруулж эхлэсэн байгаа. Мөн цаашдаа энэ төслийг хэрэгжүүлэхэд шаардлагатай төсөв хөрөнгийг шийдэх, анхан шатны эрүүл мэндийн төвүүдийг эрт илрүүлгийн загвар төв болгон өргөжүүлэх, эрүүл мэндийн даатгалын шимтгэлээ төлж чадахгүй байгаа иргэдийн асуудлыг шийдвэрлэхэд дэмжлэг үзүүлэхийг хүсье” гэв.

Байнгын хорооны дарга Ё.Баатарбилэг төслийн эхний шат амжилттай хэрэгжлээ гээд “Дэлхийн бусад улс орнууд ийм богино хугацаанд төслөө үр дүнтэй хэрэгжүүлж чадаагүй байдаг юм. Иймээс бид энэ туршлагыг сурталчлах тал дээр анхаарал хандуулж ажиллах ёстой” гэж онцлон хэлсэн юм.

Мөн тэрбээр “Элэгний эмгэггүй Архангай 2” төслийг үргэлжлүүлэхэд учирч буй хүндрэл бэрхшээлийг холбогдох яамдын албан тушаалтнуудад танилцуулж, шуурхай ажиллахыг төслийн багийнханд үүрэг болгосон юм.

Ийнхүү Байнгын хорооны дарга Ё.Баатарбилэг “Элэгний эмгэггүй Архангай” төслийн багийн гишүүдтэй уулзалт хийснээр томилолтоо өндөрлүүлсэн