Хувийн хэвшлийнхний санал санаачилгыг төрийн бодлого боловсруулагчдад хүргэх, оролцоог хангах зорилгоор Монголын худалдаа аж үйлдвэрлэлийн танхимаас зохион байгуулдаг “Business breakfast” өглөөний уулзалтын энэ удаагийн зочноор Хүнс, Хөдөө Аж Ахуй, Хөнгөн Үйлдвэрийн сайд Б.Батзориг оролцлоо.

Уулзалтад ХХААХҮЯ-ны холбогдох албадын дарга, мэргэжилтнүүд болон 80 гаруй бизнес эрхлэгчид оролцон, хөдөө аж ахуйн салбарт тулгамдаж байгаа асуудлаар санал бодлоо хуваалцлаа.

ХХААХҮ-ийн сайд Б.Батзориг “Манай салбарт хувьсгал хэрэгтэй, энэ хувьсгал бол хөгжлийн хувьсгал гээд, салбартаа шинээр батлуулан хэрэгжүүлж буй хөтөлбөрүүдээ танилцууллаа. Мөн шинээр батлагдсан ирэх 6-р сарын нэгнээс хэрэгжиж эхлэх "Мал, амьтны эрүүл мэндийн тухай" болон "Малын генетик нөөцийн тухай" хуулиудын талаар танилцуулж,  Монгол Улс малын ерөнхий эмчтэй болно. Мал эмнэлгийн ерөнхий газартай болсноор экспортоор гаргаж байгаа бүх бүтээгдэхүүнийг мал эмнэлгийн ерөнхий газар хянах юм. Ингэснээр бүтээгдэхүүний чанар сайжирч, хяналт нэмэгдэнэ. Эрүүл аюулгүй хүнсээр ард иргэдээ хангаж  мал аж ахуйн гаралтай түүхий эд, бүтээгдэхүүнийг экспортод гаргахад бодлого гарган ажиллаж байна. Малын эрүүл мэнд үндэсний хөтөлбөрийг хэрэгжүүлж вакцинаа монголд үйлдвэрлэх зорилт тавиад байгаа. Бүр үйлдвэрлэж чадахгүй байгаагаа нэг л улсаас авна” гэв.

  Манай улсын малын тоо 66, 2 саяд толгойд хүрсэн бөгөөд энэ жил 22 сая толгой төл хүлээж авна. Үүнээс гарах түүхий эд, бүтээгдэхүүнээ чанаржуулж, нэмүү өртөг шингэсэн эцсийн бүтээгдэхүүн үйлдвэрлэж, экспортод гаргахаар төлөвлөөд байна.

ХХААХҮ-ийн сайд Б.Батзориг, "Хүнс хөдөө аж ахуйн салбар бол Монгол Улсад хамгийн их ажлын байр, иргэдийг орлоготой болгодог салбар. Энэ уулзалтаар хөдөө аж ахуйн түүхий эд, бүтээгдэхүүнээ хэрхэн экспортлох, ямар шийдвэр бодлого хэрэгтэй байгаа, алдаа оноогоо дүгнэн ярилцлаа. Энэ салбарт хөрөнгө оруулалт хэрэгтэй байгааг бизнесийнхэн хэлж байна.

Тухайлбал, хөнгөлөлттэй зээл, зээлийн хүүг нэг оронтой тоо руу оруулах, жижиг дунд үйлдвэрлэгчдэд олгож байгаа зээлийн хэмжээг нэмэх шаардлагатай байгаа талаар нэлээд  саналууд ирсэн Засгийн газрын гишүүн, хөнгөн үйлдвэрлэл хариуцсан салбарын сайдын хувьд би бүх боломжийг хайж ажиллана, та бүхэн бас хамтарч асуудлаа шийдэхэд идэвхтэй оролцоорой” гэлээ.