МАЗХ “Мэргэжлийн боловсрол сургалт-Ажилсаг Монгол” үндэсний зөвлөгөөнд оролцлоо

2018.06.25

МАЗХ “Мэргэжлийн боловсрол сургалт-Ажилсаг Монгол” үндэсний зөвлөгөөнд оролцлоо

Монгол хүний үнэ цэнэ, үнэлэмж, өрсөлдөх чадварыг нэмэгдүүлэн хөдөлмөрийн зах зээлийн эрэлтэд нийцсэн мэргэжилтэй ажилтныг бэлтгэх тогтолцоог олон улсын чиг хандлагад нийцүүлэн хөгжүүлэх, салбарын нэр хүндийг өсгөх, оролцогч талуудын ойлголт эерэг хандлагыг нэмэгдүүлэн мэргэжлийн боловсрол, сургалтаар дамжуулан хөдөлмөр эрхлэлтийг дэмжих зорилгоор "МЭРГЭЖЛИЙН БОЛОВСРОЛ, СУРГАЛТ-АЖИЛСАГ МОНГОЛ" зөвлөгөөнийг 2018 оны 6 дугаар сарын 18- 19 өдрүүдэд Улаанбаатар хотноо зохион байгуулагдлаа.

“Мэргэжлийн боловсрол сургалт-Ажилсаг Монгол” үндэсний зөвлөгөөнийг Монгол Улсын Засгийн газар, Хөдөлмөр, нийгмийн хамгааллын яам, ХБНГУ-ын Олон улсын хамтын ажиллагааны нийгэмлэгтэй хамтран зохион байгуулж байгаа юм.

Зөвлөгөөний эхний өдрийн арга хэмжээ Налайх дүүргийн МСҮТ сургууль дээр тус салбарын 150 гаруй хүний бүрэлдэхүүнтэйгээр болж нээлтийн үйл ажиллагаанд Хөдөлмөр, нийгмийн хамгааллын дэд сайд С.Мөнгөнчимэг, УИХ-ын гишүүн Д.Тэрбишдагва, ХБНГУ-ын нэгдүгээр нарийн бичгийн дарга Кристиан Гласс тэргүүтэй Герман улсын төлөөллүүд, Налайх дүүргийн засаг дарга зэрэг албан хүмүүс оролцлоо. Энхий өдрийн хуралдаанаар мэргэжлийн боловсролын салбарт тулгамдаж байгаа асуудлууд болон мэргэжлийн боловсролын хуулийн шинэчлэлд санал авах, мөн багшийн хөгжлийн асуудал, сургалт, хичээлийн программ сайжруулах зэрэг асуудлуудыг хэлэлцэж тодорхой санал, санаачилгуудыг дэвшүүлсэн.

Зөвлөгөөний хоёр дахь өдөр буюу өнөөдөр эхний өдөр ярилцсан асуудлуудын хүрээнд Төрийн ордонд нэгдсэн хуралдаан зохион байгуулагдсан. Хуралдаанд УИХ гишүүн, Засгийн газрын гишүүн, Хөдөлмөр , нийгмийн хамгаалалын сайд С.Чинзориг, УИХ-ын гишүүн Д.Тэрбишдагва, УИХ-ын гишүүн , Нийгмийн бодлого, боловсрол, соёл , шинжлэх ухааны байнгын хорооны дарга Ё.Баатарбилэг, ХБНГУ-ын Элчин сайд Штефан Дуппел нар оролцлоо.

Монголын авто Замчдын холбооноос ХБНГУ-д “Авто зам, гүний байгууламжийн ажилтан мэргэжил”-ээр суралцаж байгаа суралцагчдын нэг Д.Норовсүрэн , ХБНГУ-ын Папенбург компанийн гүйцэтгэх захирал хадагтай Папенбург нар хүрэлцэн ирж “ХБНГУ-ын мэргэжлийн боловсрол, сургалтын туршлагаас” сэдэвт илтгэл тавьж Герман улсад хэрхэн суралцаж байгаа талаараа танилцуулсан юм.

Хуралдааны үеэр хэлэлцүүлэгүүд зохион байгуулагдаж “Мэргэжлийн боловсрол, сургалтад нийгмийн түншлэлийн оролцоо” хэлэлцүүлэгт МАЗХ-ны ерөнхийлөгч Т.Бямбаа оролцон санал бодлоо солилцлоо.

Энэ үеэр Сүхбаатарын талбайд мэргэжлийн боловсрол эзэмшиж буй хүүхэд, залуучуудын өөрсдийнх нь хийж бүтээсэн бүтээлийн үзэсгэлэн, яармаг суралцагчдын ур чадварын үзүүлэх тоглолт, мэргэжлийн боловсрол, сургалтын байгууллага, мэргэжлийн холбоо, оролцогч талуудын танилцуулах өдөрлөг болсон.