Эрчим хүчний сайд Ц.Даваасүрэн Говь-Алтай аймагт ажиллаж байна
2018.08.07

Эрчим хүчний сайд Ц.Даваасүрэн Говь-Алтай аймагт ажиллаж байна

Алтай /МОНЦАМЭ/ Монгол Улсын УИХ-ын гишүүн, Эрчим хүчний сайд Ц.Даваасүрэнгээр ахлуулсан ажлын хэсэг өнөөдөр Говь-Алтай аймагт хүрэлцэн ирж тус аймгийн эрчим хүчний салбарын өнөөгийн нөхцөл байдалтай танилцаж байна. 

Тэрээр Говь-Алтай аймагт гурван хоног ажиллах бөгөөд түүнийг аймгийн ИТХ-ын дарга Т.Ганзориг тэргүүтэй холбогдох албаны бусад хүмүүс хүлээн авч орон нутгийнхаа эрчим хүчний салбарт тулгамдаж буй асуудлыг танилцуулсан юм. 
Түүнчлэн Говь-Алтай, Завхан аймгийн төв, ойролцоох 8 сум тухайлбал Говь-Алтай аймгийн Тайшир, Халиун, Гуулин, Жаргалан, Завхан аймгийн Цагаан чулуут, Цагаан Хайрхан, Яруу, Алдархаан сумдыг цахилгаанаар хангаж буй Тайшир УЦС-ын түүхт 10 жилийн ой тохиож байгаа тул сайдаар ахлуулсан ажлын хэсэг тус УЦС-ын баярын хуралд оролцож мэндчилгээ дэвшүүлсэн юм. Тэрээр “Цаашид манай улсад баригдах томоохон УЦС-уудын эхлэл болж, туршлага хуримтлагдан, боловсон хүчин энд бэлтгэгдэж буйгаараа ихээхэн ач холбогдолтой. "Тайширын УЦС" баруун бүсдээ нар салхины сэргээгдэх эрчим хүчний эх үүсвэрийг хослуулан ашиглахад маш чухал үүрэгтэй. Энэ үүргээ уг УЦС-ын хамт олон сайн гүйцэтгэсээр ирсэнд бид баяртай байгаа” хэмээгээд нийт хамт олонд ажлын амжилт хүсэв.
Хурлын үеэр тус аймгийн ИТХ-ын дарга Т.Ганзориг

“Алтай нутгийн ард иргэдийн хүсэн хүлээсэн томоохон бүтээн байгуулалтын ажил болох дулааны станц барих ажилд хувь нэмрээ оруулсныг тань үнэлэн Говь-Алтай аймгийн “Хүндэт тэмдэг”-ээр шагнан алдаршуулж байна” хэмээн шагналыг гардуулав.

Тодруулбал, энэ онд дулааны станц, дулааны шугам сүлжээ барих төслийг 10 аймагт хэрэгжүүлэхээр Засгийн газраас шийдвэрлэсэн ба түүний нэг Говь-Алтай аймаг юм. 
 
Э.Нарангэрэл