УИХ-ын гишүүн Л.Энхболд Тавантолгойн ордоос 340 мянган тонн нүүрс хулгайд алдсан, үүнийг нь холбогдох байгууллагууд нотолсон хэмээн мэдэгдэв.

Тэрбээр “Өнгөрсөн долоо хоногт болсон Засгийн газрын хуралдаанаар “Эрдэнэс Тавантолгой”-н эзэмшлийн талбайгаас нүүрс алдагдсан хэргийг ажлын хэсэг хэлэлцсэн. Дөнгөж сая ажлын хэсгийн дүгнэлт миний гарт ирлээ. Миний бие өмнө нь “Эрдэнэс Тавантолгой” компанийн тусгай зөвшөөрөлтэй талбай буюу Монгол Улсын гурван сая иргэний өмч 268.3 мянган тонн нүүрс хулгайд алдагдсан гэх мэдээллийг олон нийтэд мэдээлж, хууль хяналтын байгууллагад хандсан.

Үүнтэй холбоотойгоор 268.3 мянган тонн нүүрсний төлбөр тооцоог барагдуулахдаа хоёр компанийн удирдлага гэрээ байгуулсан нь хууль эрх зүйн чадамжтай, эсэхийг шалгуулахаар АТГ-т өгсөн юм. Харамсалтай нь, үүнээс хойш таван сар өнгөрч байхад АТГ ямар нэгэн ахицтай зүйл хийсэнгүй.

Харин Засгийн газраас Сангийн сайд Ч.Хүрэлбаатараар ахлуулсан, 10 гаруй агентлагийг хамруулсан ажлын хэсэг байгуулсан. Ажлын хэсгийн шалгалтын хүрээнд ГЕГ-ын өгсөн дүгнэлтэд “Монгол Улсын гаалиар эх үүсвэр нь тодорхойгүй 390 мянган тонн нүүрс гарсан” гэж тэмдэглэсэн байна. Хил хамгаалах ерөнхий газраас “Монгол Улсын гаалиар 2013-2017 оны хооронд 849 мянган машин хил гарсан” гэж дүгнэлтдээ тусгасан. Харин ГЕГ-аас “814 мянган машин гарчээ” гэсэн. Хоёр байгууллагын өгсөн мэдээллээс харахад 35 мянган машины зөрүү гарч байгаа юм.

МХЕГ-ын дүгнэлтэд “Эрдэнэс Тавантолгой” компанийн тусгай зөвшөөрөлтэй талбайгаас 268.3 мянган тонн нүүрс биш харин 340 мянган тонн нүүрс алга болжээ гэдгийг тогтоосон байна. Мөнгөн дүнгээр тооцож үзвэл 60 орчим тэрбум төгрөгийн өмч хөрөнгө Монголын ард түмний халааснаас алга болж. ГЕГ-аас гаргасан дүгнэлтээс харвал “Тавантолгой транс” гэх компани 390 мянган тонн нүүрсийг эх үүсвэргүй хилээр нэвтрүүлсэн байна. Өөрөөр хэлбэл, аль нэг аж ахуйн нэгжээс худалдаж авсан гэх санхүүгийн баримт алга. Үүнд хэн буруутай, алга болсон нүүрсний үнийг хэн төлөхийг хууль хяналтын байгууллага л эцэслэн тогтоох үлдлээ” гэлээ.

Л.Энхболд: 340 мянган тонн нүүрс алга болсныг тогтоосон