Улаанбаатар /МОНЦАМЭ/. Уул уурхай, хүнд үйлдвэрийн яамнаас сар бүрийн “Ил тод, хариуцлагатай уул уурхай” хэвлэлийн бага хурлаа хийж, цаг үеийн асуудлаар мэдээлэл хийлээ.

Уул уурхай, хүнд үйлдвэрийн сайд Д.Сумъяабазар салбарынхаа тоон үзүүлэлтийг танилцуулахдаа,

“Энэ оны эхний долоон сарын байдлаар 26.3 сая тонн нүүрс, 764.4 мянган тонн зэсийн баяжмал, 9.2 тонн алт, 3.1 мянган тонн молибдений баяжмал, 1.7 сая тонн төмрийн хүдрийн баяжмал, 40.6 мянган тонн хайлуур жоншны баяжмал, 46.8 мянган тонн цайрын баяжмал, 3.9 сая баррель газрын тос, 8.4 мянган тонн катодын зэс үйлдвэрлэсэн байна. Энэ тоо үзүүлэлтийг өнгөрсөн оны мөн үетэй харьцуулахад зэсийн баяжмал 9.7 мянган тонн буюу 1.3 хувь, алт 236.9 кг буюу 2.6 хувь, хайлуур жоншны баяжмал 11.7 мянган тонн буюу 40.5 хувь, цайрын баяжмал 0.8 мянган тонноор буюу 1.7 хувь тус тус өсч, харин нүүрс 1.1 сая тонн буюу 3.8 хувь, молибдены баяжмал 159.4 тонн буюу 4.9 хувь, төмрийн хүдрийн баяжмал 34.3 мянган тонн буюу 2 хувь, газрын тос 473.7 () мянган баррель буюу 10.7 хувь, катодын зэс 324.4 тонноор буюу 3.7 хувиар тус тус буураад байна” гэв.

-“Оюутолгой” төсөл дээр хийж байгаа олон талын хяналт шалгалт хөрөнгө оруулалтад сөргөөр нөлөөлөх үүднээс төслийг зогсоох ёстой гэсэн яриа мөн гарах болсон. Энэ талаар юу хэлэх вэ? 

-Энэ бол Монголын төсөл. Энэ төслийг зогсооно, гацаана гэсэн зүйл ер байхгүй. Төслийн далд уурхайн ажлыг бид цаг ямагт дэмжиж байгаа, бололцоо нөхцөлөөр нь хангаж олон улсын түвшинд гаргах зорилгоор Засгийн газар болон УУХҮ-ийн яамны зүгээс энэ төслийг цаашид бүрэн дүүрэн дэмжиж ажиллах нь зүйтэй гэсэн байр суурьтай байгаа. Төсөл явдагаараа явна, засч, залруулах зүйл байгааг үгүйсгэхгүй. УИХ намрын чуулганаараа шалгалтын ажлын хэсгийн дүнг танилцуулах үеэр үүнийг хэлэлцэнэ. “Эрдэнэс Тавантолгой”-н хувьцааг олон улсын зах зээлд гаргах ажил эрчимжиж байгаа энэ үед өмнө нь хэрэгжүүлж байгаа том төслөө зогсоогоод дараагийн төслийг үргэлжлүүлж хийнэ гэсэн тийм юм яаж ч байж болохгүй. 

-“Эрдэнэт” үйлдвэрийн дансыг хаасан, битүүмжилсэн гэсэн мэдээлэл яваад байгаа. Үйлдвэрийн үйл ажиллагаа хэвийн явагдаж байгаа юу? 

-“Эрдэнэт” үйлдвэрийн өр төлбөрийн асуудалд Засгийн газар шуурхай ажиллаж байгаа. Засгийн газраас Лондонгийн Арбитрын шүүхийн төлбөр тооцоотой холбоотой, мөн уг асуудлын талаар 2 ажлын хэсэг гараад ажиллаж байна. Одоогийн байдлаар тус үйлдвэрийн үйл ажиллагаа хэвийн үргэлжилж байна. Дансыг нь хаасан, битүүмжилсэн зүйл байхгүй. 

-Өвөлжилтийн бэлтгэл ажил хангаж байгаа үед шатахууны үнэ нэмэгдээд байна. Энэ талаар ямар арга хэмжээ авч байна вэ? 

-Шатахууны үнэ дотоодын хүчин зүйлээс шалтгаалахгүйгээр нэмэгдэж байна. Тиймээс Сангийн яамтай хамтран дотооддоо шатахууны үнэ өсгөхгүй байх тал дээр олон хувилбар дэвшүүлж судалж байна. Өнөөдрийг хүртэл шатахууны Онцгой албан татварыг тэглэж ирсэн. Дотооддоо үнэ нэмэгдэхгүй байх талаас нь хувилбаруудыг ярина. Энэ долоо хоногт Засгийн газрын хуралдаанд оруулахаар төлөвлөсөн. 

-ОХУ, Хятадын талаас байгалийн хий дамжуулах хоолойг манай улсаар өнгөрүүлэхээр болсон гэх мэдээлэл хэр бодитой вэ? 

-Хийн хоолой Монголоор дамжин өнгөрөх нь агаарын бохирдлыг бууруулах талаасаа ч тэр, эдийн засгийн хувьд ч үр ашигтай. ШХАБ-ын уулзалтаар ОХУ-ын талаас эдийн засгийн талаас нь судлах чиглэл ирсний дагуу Монголоор дамжуулах асуудлыг ярих байх. Энэ асуудлыг ҮАБЗ-өөр ярьж шийдвэр гарах байх. 

 

-“Эрдэнэс Тавантолгой” ХК-ийн эрх үүргийг манай яаманд шилжүүлсэн. Хувьцаа эзэмшигчдийн эрх үүргийг төлөөлж ийм шийдвэр гарсан. УИХ-ын 73-р тогтоолын дагуу үе шаттай хийж байгаа ажил. Компанийн засаглал олон улсын хөрөнгийн зах зээлд IPO гаргахад хангах ёстой шаардлагын дагуу л олон улсын стандарт, хууль эрх зүй, санхүүгийн талаас нь бие даасан байдлыг бий болгохоор ажиллаж байна. Хувьцааны үр шимийг хүртэх хугацаа ойрхон ирсэн гэж хэлж болно. Компанийн 30 хувийг IPO гаргах асуудлаар ажлын хэсэг байгуулан, бэлтгэл ажлыг хийж байна. Энэ ажлын хүрээн авто зам, төмөр зам, усан хангамж, техникийн хэсгийн шинэчлэл, нүүрс угааж, баяжуулах үйлдвэрийн ТЭЗҮ-г хийж байна.