Нийслэлийн Засаг даргын Тамгын газар, Нийслэлийн Эрүүл мэндийн газар, “Оном сан” ТББ, Швейцарь улсын “Новартис сан”, “Эм холбоо”-оос хамтран хэрэгжүүлж буй "Эрүүл зүрх-Эрүүл Улаанбаатар" хөтөлбөрийн хүрээнд өнөөдөр Хан-Уул дүүргийн Өрхийн эрүүл мэндийн төвүүдэд даралт хэмжих багаж хүлээлгэн өглөө.

Арга хэмжээнд НИТХ-ын тэргүүлэгч Ц.Байгалмаа, НИТХ-ын төлөөлөгч Ё.Цацралтуяа, НИТХ-ын төлөөлөгч П.Батчимэг, НЭМГ-ын Нийгмийн эрүүл мэндийн хэлтсийн дарга О.Энхзаяа, ХУД-ийн Эрүүл мэндийн төвийн дарга Э.Бодьцэцэг, Хан-Уул дүүргийн Засаг даргын зөвлөх Ч.Бат-Оргил, Засаг даргын Тамгын газрын Нийгмийн бодлогын хэлтсийн дарга Н.Мэндбаяр, “Эрүүл зүрх-Эрүүл Улаанбаатар” хөтөлбөрийн удирдагч Т.Хулан зэрэг зочид төлөөлөгчид оролцлоо.

Тус цусны даралт хэмжих аппараттайтыг Хан-Уул дүүргийн 12 өрхийн эрүүл мэндийн төв буюу 4, 5, 6, 7, 8, 9, 10, 11, 12, 13, 14, 16 дугаар хороодын Өрхийн эрүүл мэндийн төвүүд хүлээн авлаа. “Майкролайф” брэндийн цусны даралт хэмжих автомат аппарат нь гурван удаагийн хэмжилтийг дараалан хийж дундаж үзүүлэлтийг гаргах боломжтой, ухаалаг гар утсанд суулгах эрүүл мэндийн аппликейшнтай, Bluetooth холболт ашиглан мэдээллийг шилжүүлж, хянах, зүрхний тосгуурын чичиргээг өндөр нарийвчлалтай мэдэрдэг олон давуу талтай аж.

Ингэснээр ӨЭМТ-үүд цусны даралт ихсэх өвчнийг эрт илрүүлэх, хянах бүрэн боломжтой болж байгаа юм.

Дэлхийн 3 хүн тутмын 1 нь буюу 31% нь зүрх судасны өвчнөөс болж нас бардаг ба зүрх судасны өвчнөөс болж нас барж буй 2 хүн тутмын 1 буюу 45% нь цусны даралт ихсэлттэй холбоотой байгаа юм. Мөн цус харвалтаас болж нас барж буй 2 хүн тутмын 1 нь цусны даралт ихсэлтээс үүдэлтэй байна.

Тэгвэл зүрх судасны өвчлөл, түүнээс үүдэлтэй нас баралтыг бууруулах, ялангуяа хөгжиж буй орнуудад эл асуудлыг шийдвэрлэхэд дэмжлэг үзүүлэх зорилгоор Швейцарь улсын Новартис сан сайн санааны байгууллага “Эрүүл зүрх- Эрүүл хот” хөтөлбөрийг санаачлан 3 тивийн 3 улсад нэгэн зэрэг хэрэгжүүлж эхлээд байна.

Ази тивээс Монгол улсын нийслэл Улаанбаатар хот сонгогдож, “ЭРҮҮЛ ЗҮРХ-ЭРҮҮЛ УЛААНБААТАР” хөтөлбөр хэрэгжиж эхлээд байна. Энэхүү хөтөлбөрийг НЗДТГ, Нийслэлийн Эрүүл мэндийн газар, Оном сан ТББ, Швейцарь улсын Новартис сан, ЭМ ХОЛБОО хамтран хэрэгжүүлж байгаа юм.

Тэр дундаа Монгол улсад зүрх судасны эмгэг, цусны даралт ихсэлттэй холбоотой тархины цус харвалт нас баралтын гол шалтгаан болж байгаа юм. НҮБ-ын төрөлжсөн агентлагийн хамтарсан багаас 2015-2016 онд хийсэн үнэлгээгээр 100.000 хүн амд ногдох тархины цус харвалтын тохиолдлоор манай улс дэлхийд нэгдүгээрт бичигдэж, дэлхийн дунджаас даруй 4 дахин их байна. Нийт нас баралтын 30% орчим хувийг зүрхний шигдээс, цус харвалт зэрэг зүрх судасны өвчин эзэлдэг бөгөөд түүний гол эрсдэлт хүчин зүйл нь цусны даралт ихсэлт юм.

Цаашид ӨЭМТ-ийн 142 төвийн 1000 гаруй эмч, мэргэжилтнийг сургалтад хамруулах, цусны даралт хэмжих багажаар хангах, даралт ихдэлтийг бууруулах чиглэлээр эрдэм шинжилгээ, судалгааны ажлыг хийхээр төлөвлөсөн байна.