Монгол Улсын Ерөнхий сайд У.Хүрэлсүх Дорноговь аймагт ажиллах үеэрээ "МАК" компанийн цементийн үйлдвэртэй танилцав.

Тус үйлдвэр нь зуурмагтаа ус ашигладаггүй, хуурай технологи хэрэглэдэг юм байна. Жилдээ 1 сая тонн цемент, 100 мянган тонн шохой чулуу үйлдвэрлэх хүчин чадалтай аж.

Тус үйлдвэр нь дотоодын хэрэглээний цементийн 40 хувийг дангаараа хангадаг бөгөөд 530 орчим ажлын байртай юм байна. Үйлдвэрийн түүхий эдээ түшиц ордуудаас шууд нийлүүлэлт хийдэг аж. Үйлдвэр нь түүхий эд боловсруулах хэсэг, чулуу болон цемент үйлдвэрлэх хэсэг, савлах хэсгээс бүрдэж байна.

-ЕРӨНХИЙ САЙД У.ХҮРЭЛСҮХ "МАК" КОМПАНИЙН ЕВРО БЛОКИЙН ҮЙЛДВЭРТЭЙ ТАНИЛЦЛАА-

Ерөнхий сайд У.Хүрэлсүх "МАК" компанийн евро блокийн үйлдвэртэй танилцлаа. Тус үйлдвэр нь 2015 онд байгуулагдсан бөгөөд Монголын зах зээлийн 50 гаруй хувийг дангаараа хангаж байгаа аж. Хоногийн 24 цагийн ажиллагаатай тус үйлдвэрт гурван ээлжээр 150 ажилтан байнгын ажлын байраар хангагдсан байна. Евро блокийн үйлдвэр нь Герман технологийн дагуу үйлдвэрлэл явуулдаг бөгөөд хоногт 900м.күб хөнгөн блок үйлдвэрлэдэг аж.

Үйлдвэр бүрэн чадлаараа жилдээ 270 сая м.күб блокийг зах зээлд нийлүүлэх боломжтой юм байна. Зах зээлийн эрэлт нь өндөр учир бүтээгдэхүүний төвлөрөл үүсдэггүй, шууд борлуулагддаг гэдгийг үйлдвэрийн зүгээс онцлов.

Үйлдвэрээс гарч буй блок нь галд тэсвэртэй, дулаан алдалт бага, нягтаршил өндөр учир ашиглалтын зардал бага гардаг гэдгийг үйлдвэрлэгчид тодотгож байлаа. Евро хөнгөн блок нь зах зээл дээр нэг м.күб нь 140.500 төгрөгөөр борлуулагддаг аж.

Г.ИТГЭЛ

Ерөнхий сайд "МАК" компанийн цемент, блокийн үйлдвэртэй танилцав