УИХ дахь Ардчилсан намын бүлгийн гишүүд Цус сэлбэлт судлалын үндэсний төвд очиж, цусаа хандивлалаа. Өглөөний 10:00 цагт Цус сэлбэлт судлалын үндэсний төвд ирэхээр болзсон гишүүдийн түрүүнд П.Алтангэрэл гишүүн ирсэн байв. Харин түүний дараа Д.Кёкшюүзан Батбаяр Д.Ганхуяг, Я.Батсуурь нарын гишүүд ирсэн юм. Тэдний араас З.Энхболд, Ч.Сайханбилэг, Л.Гүндалай, Г.Баярсайхан, С.Эрдэнэ нар  хүрэлцэн ирэв. Аравдугаар сарын 30-ны өдөр Ерөнхийлөгч Ц.Элбэгдорж тус төвийн үйл ажиллагаатай танилцан, цусаа хандивласныг АН-ын бүлгийнхэн дэмжиж, ийнхүү цусаа өгөхөөр болжээ. Энэ тухай өнгөрөгч даваа гаригт хуралдсан бүлгийн хуралдаанаар шийдвэрлэсэн байна.

Гишүүд донорын бүртгэлийн болон үзлэгийн өрөөнд орсны дараа цусаа өгч болох эсэхээ тодорхойлуулсан юм. Үзлэгийн дараа Д.Кёкүшюүзан Батбаяр, З.Энхболд, Я.Батсуурь, П.Алтангэрэл нарын гишүүд өглөөний хоолоо идсэн байсан тул цусаа өгөх боломжгүй болов. Учир нь өглөө хоол идсэн тохиолдолд тухайн хүний цусанд өөх, тос нь шингэчихсэн байдаг гэнэ. Тэр ч бүү хэл цусаа өгөхийн өмнөх долоо хоногийн турш спиртний төрлийн бүтээгдэхүүн хэрэглэж болохгүй байдаг аж. Д.Ганхуяг гишүүн түрүүлж цусаа өгөв. Тэрээр оюутан байхдаа цусаа өгч байсан туршлагатай нэгэн гэнэ. Харин Л.Гүндалай гишүүн анх удаа цусны хандив өгч байгаа бөгөөд түүний цус хоёрдугаар бүлгийнх байлаа. Хоёр гишүүн тус бүр 400 грамм цус өглөө. С.Эрдэнэ, Г.Баярсайхан нар ч цусаа хандивлалаа. Хамгийн сүүлд донорын өрөөнд орсон хүн бол бүлгийн ахлагч Ч.Сайханбилэг байв. Тэрээр өмнөх өдөр буюу лхагва гаригийн шөнө томилолтоос ирсэн тул нэлээд ядрангуй царайтай харагдсан. Тиймээс эмч нар багахан хэмжээний цус өгөхийг санал болгосон юм. Гишүүдийг ийнхүү цусаа өгч байх зуурт энгийн иргэд ч олноороо тус төвд ирж байв. Өнгөрөгч сард өдөрт ердөө арав хүрэхгүй хүн ирдэг байсан бол Ерөнхийлөгчийг цусаа өгч, иргэддээ донор болохыг уриалснаас хойш энэ тоо хоёр, гурав дахин өсч, энэ долоо хоногт тус төв нэлээд ачаалалтай ажиллаж байгаа тухай эмнэлгийн ажилтнууд ярьж байв. Хоёр хоногийн өмнө бүр 50 гаруй донор ирсэн гэх сайхан мэдээг ч дуулгаж байв. Түүнчлэн байгууллага хамт олноороо цусаа өгөх олон санал ирснийг Цус сэлбэлт судлалын үндэсний төвийн дарга Д.Улаанхүү ярьж байв. Өнөөдрийн байдлаар тус төвөөс эмнэлгүүдийг цус, цусан бүтээгдэхүүнээр бүрэн хангаад байгаа бөгөөд цусны нөөцтэй болж байгаа аж. Ерөнхийлөгчийг цусаа өгөхөөс өмнө цусны нөөцтэй болох нь бүү хэл томоохон эмнэлгүүдээ ч цусан бүтээгдэхүүнээр хангаж чадахгүйд хүрээд байсан юм.

Цусаа өгч байгаа иргэд ихэвчлэн залуучууд байх бөгөөд гадаадын иргэд ч харагдана лээ. Гэхдээ тэдгээр гадаадын иргэд цус нь өтгөрсөн тул өгөхийг хүссэн байна. Энэ тохиолдолд цусыг авдаггүй байна. Учир нь цусыг цаашид өвчтөнд ашиглах тул ямар нэгэн өөрчлөлтгүй байх ёстой байдаг байна.

Гишүүд цусаа егсний дараа төрөөс олгодог урамшуулал болох 1000 төгрөг, кофе, шоколад, печень, соруултай ундаагаа барьсаар гарч одно лээ. Дашрамд хэлэхэд, Бүлгийн 18 гишүүн цусаа өгөхөөр санал гаргасан бөгөөд энэ өдөр орон нутаг болон гадаадад томилолтоор явсан гэдэг шалтгаанаар нэлээд олон гишүүн хүрэлцэн ирж чадаагүй юм. Гэсэн ч тэд дараа, дараагийн өдрүүдэд очиж, цусаа хандивлах гэнэ лээ.